U MDC jong ka Voice of the People’s Party na ka 11-Shiliangmyntang Constituency, West Jaintia Hills District u ma Daeimi Liam, mynta ka sngi ula wan ban ai ka jingkyrshan ia u bah Marshall SB Biam, President ka Jaintia Coal Owner Minirs Supplier & Workers Association (JCOMSWA) ha ka jaka shong shah thngan jong u ha Ladrymbai Dongwah, East Jaiñtia Hills District.
U tei u MDC (Daeimi Liam), haba ai jingkren ha katei ka jaka u la ong ba ki briew ki lah ban sngewphylla ia ka jingwan jong u sha kane ka jaka ban ai ka jingkyrshan ia u bah Marshall halor kane ka jingiakhih jong u da kaba shong shah thngan khlem buh por. Hynrei ula ong ba haba u ioh jingtip ba u don u riew rangbah napoh East Jaintia u bah Marshall Biam, uba la shim ia kane ka jingiakhih kaba kongsan, ula dap da ka jingsngewkhia halade, u ong ruh shi bynta u dei paradoh parasnam bad u bah Marshall bad kaba ar pat ka long ba u kynmaw ha kipor ba mynshwa katba dang ioh ban tih bad khaïi dewiong ha ki sha kine ki thaiñ (East Jaintia mynta) ka long ka jingdap jingbiang ym tang ia kane ka thaiñ, hynrei ia baroh lang ki nong Jaintia, kumta ka long kaba sngewdonkam shisha ia u ban wan ai ka jingkyrshan ia kane ka jingdawa.
U la ong ka ka jingdon kum kane ka jingiakhih ka long kumba kyrsiewthiah ia ka sorkar, u la ong ba ki ar ngut ki nongmihkhmat kiba don hapoh East Jaintia ba kumba ki ioh shong ia ka shuki ka dei na ka daw jong u paidbah uba la jied ia ki, kumta ruh ki dei ban mih shakhmat bad ban pynap pynsngew ia ka jingud jingnam jong u paidbah. U la ong ba ka jingwan jong u kam dei satia ka jingleh politic, hynrei ka dei tang kum u shakri paidbah ryngkat ka jingsngewkhia jong u bad pynpaw ruh ba u ai ka jingkyrshan kaba 100 na ka 100 ia kane ka jingiakhih jong u bah Marshall.
U ma Daeimi ula pynkynmaw ruh ba kumba long mynta wat ka JHADC ruh kam ioh shuh ia ka khajna na u Dewiong kumba ju long ha ki por kiba mynshwa, wat la ka jingdon jong u dewiong ka la jan lut artad. Kumta u ai khublei ia baroh ki nong East Jaintia kiba la ia don bynta ha kane ka kam bad u khot u wer ia ki riew paidbah ba kin ia mih shuh shuh ban ai ka jingkyrshan ia kane ka jingiakhih bad donbok ban ioh kheit ia u soh uba thiang na kiba thiang tam ong u ma Daeimi.