Ka President jong ka Meghalaya Indigenous Women’s Council (MIWC) ka kong Bythygrace Dkhar mynta ka sngi kala wan ban ai ka jingkyrshan ia u President ka JCOMSWA u bah Marshall SB Biam halor ka jingiakhih jong u, da kaba shong shah thngan khlem buh por ha Ladrymbai Dongwah.
Ka kong Bythygrace Dkhar haba kren bad ki lad pathai khubor mynta ka sngi ka la ong ba ka mat ba la shim da u President ka JCOMSWA ka long kaba donkam haduh katta katta namar bun ki briew ha East Jaintia Hills District ki shaniah ha ka jingtih dewiong na ka bynta ka jingim jong ki. Kiba bun ki longïing ha ka distrik mynta ki ïakynduh ïa ka jingduk bad jingeh man ka sngi; bun ki briew ki la jan iap na ka jingkyrduh. La palat 12 snem ka sorkar kam shym la shim ia ka jingkitkhlieh kaba pura, bad i kumba ka ieh beiñ ia ki paidbah ka East Jaintia Hills. Ka sorkar kaba don ha ka bor ka dei ban wad ki lad ki lynti ban sdang biang ia ka jingtih dewiong khnang ba ki paidbah ka East Jaintia Hills District kin ym sah mraw ha ka jingduk.
Ka la pynpaw ba naduh u snem 2014 arngut ki briew ki la duh noh ïa la ka jong ka jingim. Ka la ong ruh ba hapoh ka Sixth Schedule ngi don hok halor ka khyndew ka shyiap jong ngi; lada ka khyndew jong ngi ka don ia ki marpoh khyndew, balei ngin shah khang da kum kine ki kyndon ain?
Ka kong Dkhar ka la bynrap ruh ban sdang ia ka jingtih dewïong (Open-cast mining) ha East Jaintia Hills District kam long kaba lah namar kan ktah ia ka mariang sawdong. Ngi dei ban pyrkhat ia ka lawei: lada ngi tih ia u dewïong da katta ka (Open Cast Mining), ka khyndew ka lah ban ym long shuh kaba lah ban pyndonkam na ka bynta ka rep ka riang.
