Mynta ka sngi, 10 tarik u Jylliew 2026, ki dkhot ka Khasi Students Union (KSU), East Jaintia Hills District, ki la mih ban kyrshan ia u President jong ka JCOMSWA (Jaintia Coal Owners, Miners, Suppliers & Workers Association), u Bah Marshall S. B. Biam, uba la don ha ka jingiakhih shah thngan kaba khlem buh pud.
U Biam u la pynlong ia ka jingiakhih ban kyntu ia ka sorkar ba kan shah ia ki kam tih dewiong ban sdang biang ha East Jaintia Hills District.
Ia kane ka kynhun ka KSU la ialam da u President ka KSU East Jaintia Hills District u Bah Streamly N. Suchen bad u General Secretary u Kwilnis Suchiang, ha ryngkat kiwei pat ki dkhot ka KSU.
U bah Kwilnis Suchiang u la ialam ruh ia ka jingduwai na ka bynta u Marshall S. B. Biam, ha kaba la ia snoh kti lang da ki nongkyrshan, ki dkhot ka KSU, bad kiwei kiwei kiba la don lang.
Haba kren sha ki lad pathai khubor, u President ka KSU u Streamly N. Suchen u la ong ba ka KSU ka ngeit ba u Bah Biam u kwah shisha ban plie biang ia ka jingtih dewiong ha kane ka jylla. Naduh ba la khang ka National Green Tribunal (NGT) ha u snem 2014, ka kamai kajih jong kiba bun ki briew khamtam ki longiing kiba duna ka ioh ka kot kiba trei dewiong ka la shah ktah jur. Ka Meghalaya ka long kaba riewspah ha u dewiong, bad ka ioh ka kot ka kham khlaiñ haba ka jingtih dewiong ka iaid laitluid.
U bah Suchen u la ong ba bun ki samla na East Jaintia Hills ki la leit buhai shnong shawei na ka bynta ka kam bad ki ju shah lehbein ha ki jaka kum ha Delhi bad ha Bengaluru. Ka KSU ka ju ïakynduh bunsien ïa kum kine ki jingjia. U la kyntu ia ka sorkar ba ka dei ban shim khia ia kane ka kam bad u la khot ia ka jingiakhih halor ka jingshah thngan jong u President ka JCOMSWA.
U Suchen u la kdew ruh ba hapoh ka Sixth Schedule, ki briew ki don ka hok halor ki jaka jong ki, bad u la kyrpad ia ka sorkar ban weng noh ia ka jingeh kaba la slem bha halor ka jingtih dewiong. U la ong ba ka jingiakhih ha ki por ba lah dep ka la don ka jing sngewsih ha kaba ki arngut ki briew na ka Shnong Wapungskur ki la duh noh ia la ka jong ka jingim. U la kyntu ia ka sorkar ba kan ailad biang ia ki kam tih dewiong ha ka District.
Ka jingkhang tih dewiong ka la ktah ym tang ia ka East Jaintia Hills hynrei ia kiwei pat ki district ha Meghalaya ha kaba kiba bun ki shaniah ha u dewiong na ka bynta ka jingim jong ki. U Suchen u la bynrap ba ar tylli ki seng ki dang trei ban weng noh ia katei ka jingkhang, bad ba baroh ar ki don kajuh ka thong ban plie biang ia ka jingtih mawshun. Ka KSU ka kyrshan ia baroh ar tylli ki seng bad kan iashim bynta ha ki prokram ba la pynlong da ki ban pynbor ban sdang biang ia ka jingtih dewiong.
