U President ka East Jaiñtia Hills Truck Owners Transport Association (EJHTOTA) u bah Kyrshan Dkhar mynta ka sngi haba ïakren bad ki lad pathai khubor u la ïathuh ba ka seng jong u ka ai ka jingkyrshan ïa ka seng ki nongtih dewïong ka Jaiñtia Coal Miners and Dealers Association (JCMDA) ha ka jingïakhih jong ki ban sdang biang ïa ka jingtih dewïong hapoh ka District.
Ka JCMDA ka la pynlong ïa ka jingïalang ha ka 7 tarik u Ïaiong 2026. Ka seng ka la ai por lai bnai ia ka sorkar ba kan wad ia ka lad ka lynti ka ban ailad ia ka jingtih dewiong ban sdang biang.
U bah Kyrshan Dkhar u la ong ba ka jingkyrshan jong ka EJHTOTA ka long hadien ka shithi na ka JCMDA kaba kyntu ban kyrshan. U la ong ba ka jingkhang tih dewiong ha u snem 2014 ka la ktah jur ia ka jingim jong ki nongshong shnong. Kum ka seng kaba dei ban peit ban kit bad pynhap ia ki mar ha kylleng ka East Jaintia Hills bad shawei ruh, ka EJHTOTA ka la sakhi haduh katno tylli ki longiing ki shaniah ha ka kamai kaba iadei bad u dewiong. “Haba la ailad ban tih dewiong, ki briew ki la shngaiñ bad ka jingim ka la skhem”, u la ong. “Mynta bun ki la duh jingkyrmen; ka bai skul bad ka bai ïing ka la long kaba eh ban pynbiang.” u la ong shuh shuh.
U Dkhar, uba dei u trai trok hi, u la batai ia ka jingmyntoi kaba ki nongniah bad ki trai trok ki ioh na kaba kit ia u dewiong. U la batai ba ka JCMDA ka dei kawei na ki seng dewiong kaba la rim tam hapoh ka distrik, bad u la ong ba ka dang pynkhreh ia ka jingtyrwa na ka bynta “small underground scientific coal mining” ban pyni sha ka sorkar. U la bynrap ruh ba ka jingtih dewiong ka (open-cast mining) ka long kaba eh ha East Jaiñtia Hills namar ka jinglong ki jaka ha ka district.
Katkum ka jingong u Dkhar, lada ka rukom trei ia u dewiong da ka ‘small underground scientific coal mining’ kan seisoh ka lah ban pynbiang ïa ki jingdonkam jong ki paidbah bad ban thaw lad na ka bynta ki nongtrei kiba rit bad ki trai kam kiba heh lada la mynjur da ki bor synshar. U la ong ba kiwei ki seng ruh ki la mih shakhmat ban dawa ban shah biang ban tih dewiong.
U Dkhar u la kyntu ïa ki nongïalam ha ka kyrdan distrik bad jylla ban ïatreilang khnang ba yn lah ban pynbeit ïa ki jingdawa jong ki paidbah. U la kyrpad ia ka sorkar ba kan pyrkhat ia ki jingai jingmut jong ka JCMDA bad ban leh ban pynjem ia ka jingjynjar jong ki briew ha East Jaintia Hills. “Ngam pat ju ïohi ïa ka sorkar kaba sngap bad ïatrei lang bad ki paidbah kum kane”, u la ong da kaba pynpaw ka jingkyrmen ba ka sorkar kan sa shem kloi ïa ka lad ban weng ïa kane ka jingeh.