Ki ar ngut ki MLA jong ka East Jaintia Hills District kiba ia u ma Kyrmen Shylla, uba dei u MLA bad Ex-Minister na ka Khliehriat LA Constituency bad ka kong Santa Mary Shyll ka MLA jong ka Sutnga-Saipung, mynta ka sngi (11/6/2026) kila wan jngoh bad ai ka jingkyrshan ia ka jingshong shahthngan jong u President ka JWOMSWA u ma Marshall SB Biam, kaba dang iaid haduh mynta la 11 sngi, ha Madanbol jong ka Ladrymbai Dongwah, East Jaintia Hills District.
U ma Kyrmen Shylla haba kren ha kane ka sngi, u ong kane ka jingdawa jong ka Jaintia Coal Ownner Miners Supplier & Workers Association (JCOMSWA) bad ka jingshah thngan u President jong ka u Marshall SB Biam ka long kaba shongnia na ka bynta ka jingmyntoi jong ki nongshong shnong ka thaiñ ban ioh tih biang ia u dewiong, kumba ju long ha ki 12 snem mynshwa. Na ka liang jong u ma Kyrmen ula ai ka jingiaroh ia u Marshall Biam uba la kloi ban aiti ialade na ka bynta ka jingmyntoi ki paidbah. U ong ba un sa wan rah ia kane ka jingdawa jong ka Association lyngba ki Memorandum kiba la aiti, sha u Myntri Rangbah ka jylla u Conrad K Sangma, hadien ka jingwanphai jong u na nongbah Delhi ha ka 15 tarik mynta u bnai.
U ma Kyrmen u ong ba lada ka sorkar kam sngap ia kane ka jingdawa ban ailad ban tih dewiong, ym dei tang u President ka JCOMSWA un shah thngan, hynrei ma ki ruh kum ki nongmihkhmat ryngkat u paidbah kin sa pynlong ia ki jingiakhih, ban pynshah skhor ia ka sorkar, tad haduh ba kan da pyllait ia ka jingtih dewiong.
Ka kong Santa Mary Shylla, ha ba kren ka ong ba kane ka jingiakhih jong ka Association bad ka jingshah thngan jong u President jong ka, ka long kaba shongnia. Kala pynpaw ba na ka liang jong ka sorkar ruh kala shimkhia ia kane bad kala buh por haduh ka 7 tarik u July ban leh ei ei. Hynrei lada ka sorkar kam pyllait ban tih dewiong hadien katei ka 7 tarik u July ma ki kum ki nongmihkhmat ruh kin iashim bynta lang ban shah thngan.
