U Principal jong ka North Liberty Higher Secondary u Sir. B Richard Uriah ula pyntip ba ka sorkar lyngba ka tnad pule puthi kala ailad kum ka kabu ksiar ïa kito kiba la heh ka rta ba kin pyndep ïa ka Matrik namar ka jingbym ïoh lad jong ki ban bteng ïa ka jingpule na ki daw kiba bun bad ki jingïakynduh ha ka jingim.
Kumta u khot lada don kino kino kiba la dap 15 snem shaneng bad ki bym leit skul shuh wat lada kiba la pyndep tang ïaka klas 7 shapoh, ki lah ban leit ïa kynduh ïa u ha North Liberty HSS kaba don tang 200 seats bad kaba la jied da ka sorkar kum kawei na ki Center ban ai jinghikai manla ka sngi Siatjaiñ ka ban sdang noh hadien jong une u bnai Jylliew, 2026.
Ula ai khublei ïaka sorkar lyngba u Myntri Rangbah ka jylla uba la don jingmut ïa kane, da kaba pynsngew wat ban ïoh ïa ka Driving License mynta dei ban don ïa ka kyrdan pule, u Sir. Richard u khot ïa kito kiba la don 30 ne 40 snem shaneng ruh kiba la thrang ban pyndep ïa ka jingpule Matrik ba kin wan sha kane ka jingshah hikai ha katei ka skul North Liberty HSS.
Shuh shuh ula kyntu ba kin wan kloi sha kane ka jingshah hikai da kaba pyndap ïaka Form na ka bynta ka jingmyntoi jong ka imlang ka sahlang bad ban pynurlong ïaka jingthrang jong ka sorkar kaba don ïaka thong baroh ki nongshong shnong ki dei ban pass ïaka Matrik bad ban nang kyndiat kynshoit shaphang ka Mathematic, Science, English bad kiwei de ki Subject.
Haka juh ka por kum u kloi ban ai jingïarap ïa kino kino ki samla pule kiba kwah ban leit pule haki laiñ bapher bapher bad ïa ki jingtip kiba khambniah, da kaba kdew ba ka kam lajong ka long ka lad ïoh kam kaba khlem kut ha ka jingim. Pynkut u Sir. Richard Uriah haba ai jingkren mynta ka sngi ha ka prokram pynkup burok ïa ki samla pule ha Lumpyrdi Mihmyntdu.