U ma Marshall Biam, President ka Jaintia Coal Owner Miners Supplier & Workers Association (JCOMSWA), uba dang don mynta hapdeng ka jingshah thngan kaba la kot sha ka 11 sngi, ula iohlad ban pynpaw ha khmat ki 2 ngut ki MLA jong ka East Jaintia u ma Kyrmen Shylla bad ka kong Santa Mary Shylla kiba la wan jngoh ia u mynta ka sngi.
U la ong ba shibun ki huri hura ki mih ha ki ïing ki sem jong ki nongshong shnong ka East Jaintia Hills District, ka dei na ka daw jong ka jingbym don jingtrei jingktah ki kmie ki kpa. Kane ka jingbym don jingtrei kala wanrah ia ka jingpep skul shiteng por jong ki khun ki kti, ka jingeh ban pyndap ia ki jingdonkam ha ïing ha sem bad shibun ki jingeh kiba la ktah ruh ia ka imlang ka sahlang, tang na ka daw ka jingshah khang ban tih bad khaïi ia u dewiong hapoh ka District.
Kumta na ka liang jong u, kum u nongialam jong ka Jaintia Coal Owner Miners Supplier & Workers Association (JCOMSWA) ula buh ka jingkyrpad ia kitei ki ar ngut ki MLA ba kin leit rah hakmat ka sorkar ia ki jingdawa jong ka Associatiation khnang ba ka sorkar kan pyntreikam noh ia ki. U ong ba kumba long mynta ka sorkar ka la slem palat ban shim khia halor kane kaba dei ka jakpoh jong ki nongshong shnong.
U ma Marshall u la ong shuh shuh ba lada ka sorkar kam pynurlong ia ki jingdaw kata ban plie noh ia ka jingtih dewiong hapoh East Jaintia Hills, un iai bteng ia ka jingiakhih jong u bad u hun ban iap na ka bynta ka jingmyntoi jong ki paidbah jong ka District.