U myntri ka koit ka khiah u ma Wailadmiki Shylla hynne ka sngi u la wan ban iashim bynta ha ka jingrakhe ia ka International Day of Yoga ka ba la pynlong da ka District Ayush Society, West Jaintia Hills District ha Khimusniang Indoor Hall, Jowai halor ka phang “Yoga for Healthy Aging.”
Ka DMHO Dr.(Mrs) P. Shylla, ka District Nodal Officer (Ayush) Dr. Bonnie T Hinge, kumjuh u Waheh Shnong jong ka Khimusnaing Dorbar Shnong ma TS Bamon u la don lang ha kane ka sngi.
Ha ka jingkren jong u myntri ka koit ka khiah ma Wailadmiki Shylla u la ban jur halor ka jingnang kiew ka jingdonkam jong ka yoga ha kane ka juk kaba mynta. U la kdew ba ka yoga ka la ïoh ïa ka jingithuh bad jingshah jied ha baroh ki bynta jong ka imlang sahlang, kynthup ïa ki riew pawkhmat bad ki riew pawnam, namar ka jingmyntoi na ka bynta ka jingkoit jingkhiah ha ka met bad ka bor pyrkhat.
U la ïohi ba ka jingkiew jong ki jingpang na ka daw jong ka rukom im ka la pynlong ïa ki prokram kum ka sngi jong ka Yoga ha shityllup ka pyrthei ban kham ïarap ban ha ki por ba kham mynshwa. U la pynpaw ba ka jingleh yoga man ka por ka la iarap ia kiba bun ki briew ban pynduna ia ka jingkhuslai, ka pynbha ia ka koit ka khiah jong ki baroh kawei bad ka la pynduna ia ka jingma na ki jingpang bapher bapher.
Haba khot ia ki samla pule ban shim khia ban kyntiew ia ka rukom im kaba koit ba khiah, u myntri u la kyntu ia ki samla pule ban long kum ki nongmihkhmat jong ka yoga bad ban pynphriang ia ka jingtip shaphang ka jingmyntoi hapdeng ki paralok bad ki shnong ki thaw jong ki. U la ban jur ba ki samla ki don ka sap ban pynmih ia ka jingkylla kaba bha bad ban iarap ban tei ia ka imlang sahlang kaba koit ba khiah.
Ka DMHO Dr. (Mrs.) P. Shylla ka la pynpaw ïa ka jingkordor jong ka Yoga kum ka jingai jong ka India sha ka pyrthei bad ban jur ïa ka jingdonkam kaba nangroi ha kaba ïakhun pyrshah ïa ka jingkhuslai bad ki jingpang kiba ïadei bad ka rukom im. Haba ïadei bad ka phang, “Ka Yoga na ka bynta ka jinglong tymmen kaba koit ba khiah,” ka la pynpaw ïa ka jingmyntoi jong ka jingleh yoga man ka por ha kaba pynduna ïa ka jingkhuslai, ban pynneh ïa ka koit ka khiah bad ban ïada na ki jingpang. Ka la pynshlur ruh ia ki samla pule ban pynlong ia ka yoga kum shi bynta jong ka jingim ba man ka sngi jong ki bad ban pynphriang ia ka jingtip shaphang ki jingmyntoi jong ka.
Ha ka jingkren ba lamphang jong ka Dr. Bonnie T Hinge ka la kdew halor ka bynta jong ka yoga ha kaba kyntiew ïa bha ka miat ha ka met, ka jingkoit jingkhiah ha ka bor pyrkhat bad ka rukom im kaba koit ba khiah. Ka la ban jur ba ka yoga ka iarap ia ki briew shimet ban ioh ia ka jingsuk ba shapoh bad ka jingkoit jingkhiah baroh kawei. Ka la pynrung ruh ia ki rukom sumar AYUSH bad ka la pynshlur ia ki samla pule ban shim ki lad sha kane ka thup. Da kaba pynksan ïa ka jingdonkam jong ka jinglong ryntih bad ka jingim kaba koit ba khiah, ka la kren halor ki nongrim jong ki ‘5S’ – Sort, Set in order, Shine, Standardize bad Sustain bad ka la kyntu ïa ki samla pule ban dang pynleit jingmut ha kaba tei ïa ka lawei kaba koit ba khiah bad kaba jop.
Ia kane ka jingleh yoga la ialam da ka Yoga Demonstrator ka Dr. Tremonnmi Bamon, Medical Officer (Yoga & Naturopathy of Civil Hospital Ialong) and ka Yoga Instructor Dr. Bonnie T Hinge.
