Ki nongshetja skul hapoh ka shatri jong ka Union Cook Helpers Poshan Meghalaya ha ka 19 tarik Jylliew 2026 ki la pynpaw bad kyntu ia ka sorkar ban kyntiew noh ia ka jingsiew na ka 2000 sha ka 9000 tyngka shibnai.
Haba kren sha ki lad pathai khubor na ka liang ka President jong ka Union Cook Helpers Poshan Meghalaya ka Kong Gina Nongneng ka la pynpaw ba ki nongshetja skul ki kyntu ia ka sorkar ba kan pynkiew noh ia ka bainong jong ki na ka 2000 sha ka 9000 namar ka tulop ba ki ioh ka long tang 10 bnai lait noh ha ki bnai bym long skul.
Nalor kata ka la pynpaw ruh ba ki nongshet ja skul ki la dep phah ruh da ka jingthoh sha u Myntri Rangbah Duh ka Ri U Narendra Modi bad kumjuh sha u Dharmendra Pradhan ba un sngap lang ia ka jingdawa pynkiew ia ka bainong na ka bynta ki nongshetja skul.
Ka Kong Gina Nongneng ka la iathuh ba ki la dep ban phah ruh da ka shithi sha ka Myntri ka sorkar pdeng ba khmih ia ka tnad pla tyngka ka Nirmala Sitharaman bad kyntu ba kan sngap lang ia ki nongshetja skul khamtam ba bun na ki, ki dei ki longkmie.
Nalor kata ka Kong Gina Nongneng ka la pynpaw ruh ka jingsngewnguh ia u Myntri Rangbah ka jylla u Conrad K Sangma u la pynkiew ia ka jingsiew haba iadei bad ka bhah na ka jylla na ka 100 sha ka 1100 na ka bynta ki nongshetja skul.
Shuh shuh ka la ong ba ki nongshetja skul ki dei ban trei bha ia ka kam bad na ka bynta ka jingbam jong ki khynnah ha skul.
Kumta na ka liang ka President ka Kong Gina Nongneng ka kyrpad ia ka Sorkar pdeng ba kan kyntiew noh ia ka bhah kaba ki ioh na ka sorkar pdeng na ka 900 sha ka 9000 tyngka.
Khatduh ka la ong ba lada ka Sorkar kam pynkiew ia ka jingsiew haba iadei bad ki nongshetja skul ka Sorkar ka dei ban weng noh syndon ia kane ka skhim napoh ka jylla Meghalaya la pynpaw ka President ka Union of Cook Helpers Poshan Meghalaya.