Ha ka jingialang paidbah kaba la khot da ka Jaintia Coal Owner Miners Suplier & Workers Association (JCOMSWA) hynne ka sngi 22/06/2026 ha Madanbol Ladrymbai Dongwah, ka jaka ba shah thngan u President ka Association, ma Marshall SB Biam, wat hapdeng kka jingpynthut u slap da ki spah ngut ki paidbah napoh ka East Jaintia Hills District bad nabar ki la ia wan ban kyrshan ia ka jingdawa ka Association ban dawa na ka sorkar ba kan weng noh mardor ia ka Aiñ khang tih dewiong bad ban ai lad ia ki trai muluk trai jaka kiba don par dewiong ba kin tih bad die dewiong kumba ka long ha shwa ka snem 2014.
Ia ka jingialang la pyniaid da u ma Overcome Dkhar uba long ruh u Information Secretary jong ka Association bad ki nongkren kiba kongsan ki kynthup ia ka kong Jhanika Siangshai, ma Diamond Chyrmang na ka shnong Jalaphet, ma Ham Kyndait na Wapung Shnong, ma Hamjngai na i Tang na Sahsniang, ma Wanshwa Nongtdu uba long ruh u spoke Person ka MCTODA, ma Marshal SB Biam President ka Association bad kiwei de.
Haba kren ha kane ka sngi baroh ki nongkren da kawei ka sur ki kyrpad “Ko Nongmihkhmat ka East Jaintia Hills, MLA bad MDC bad ko Sorkar MDA to sngew synei lem i aki trai Dewiong jong ngi ba kin lah ban tih dewiong kumba ka long ha shwa ka snem 2014”.
Ki Nongkren ki pynkynmaw ruh ba ha ka Constituency jong u ma Kyrmen Shylla bad kong Santa Mary Shylla, kiba bun na ki nongshong shnong ki im da kaba tih bad trei ha ki par dewiong bad die dewiong bad haba “Phi kum ki nongmihkhmat MLA bad phi ki MDC phim sngew donkam shuh mo ia ki trai dewiong, ia ki nongtrei dewiong, ki nongdie bad ki nongthied, nongpet dewiong? Lada phi dang sngewdonkam ia ki te to ieng dap shynrang da kynthei bad dawa ban weng noh mardor ia kane ka aiñ khangtih dewiong ba ki trai par dewiong kin lah ban tih bad die dewiong kumba ka long ha shwa ka snem 2014” la buh jingkylli ki nongkren.
Hapoh kine ki 12 snem, ngi ki trai dewiong, ki nongtih, ki nongdie nongthied, ngi shaniah ha ki nongmihkhmat MLA bad MDC ban dawa ban pynlait khangtih dewiong na ka NGT bad ka sorkar, pynban kane ka jingshaniah tang ha ki nongmihkhmat paidbah (MLA & MDC) kim bna ia kane ka jingeh jong ki paidabh, kumta mynta ym tang ka jingiakhih jingdawa tang na ka JCOMSWA, hynrei da ngi ki paidbah kiba im ha ka tih, thied pet bad khaii dewiong.
U ma Marshall SB Biam, President ka JCOMSWA, wat hapdeng ka jingtlot ka met na ka jingshah thngan kab 18 sngi lynter, haba kren ha kane ka sngi u ong wat lada ngi weng noh ia ka jingshah thngan, hynrei pat ka Association kam sangeh ban dawa ban pynlait na ka aiñ khangtih dewiong bad katba ym pat pynlait ka Association bad ki paidbah kin iaid da kawei pat ka rukom iakhih ia kaba mynta kim pat sngewdei ban pynbna paidbah, pynkut u ma Marshall SB Biam.
Ha kane ka jingialang sawa ka sur u paidbah “Mynta ki nongialam ka Association kin sangeh ka shah thngan bad ngi ki paidbah ngin mih madan noh hi ha surok, jia katba jia ka jingdawa kan iaid shaphang tat haduh ban da pynlait ka sorkar ba ki trai par dewiong kin iohlad ban tih ban die bad ki paidbah kin ioh jingtrei ban ym kut lad ban pyndap pynbiang ia ka bam ka sa ha ïing ha sem ban shna ïing shna sem bad ban pynleit skul ia ki khn ki kti kat kum ka juk mynta sawa ka sur ki paidbah.
