Ka samla Olivia Dkhar, ka nongïalehkai arm wrestling na ka shnong Khahnar kaba don ha East Jaiñtia Hills district, ka la ïakren bad ki lad pathai khubor mynta ka sngi halor ki jingjop ki jong ka ha ka lympung ïalehkai arm wrestling bad para arm wrestling ba 4 jong ka PAFI National Arm Wrestling bad Para Arm Wrestling Championship 2026.
Kane ka lympung ïalehkai ka la sdang naduh ka 29 u bnai May haduh ka 1 tarik u bnai June 2026. Ka Olivia ka la khur ar tylli ki takma ksiar bad kawei ka takma rupa. Ha ka kyrdan jong ki samla 65 kg ka la khur ia ka takma ksiar ha ka jingialehkai kti kamon bad ka rupa ha ka jingialehkai kti kadiang; ka la ioh ruh ia ka takma rupa ha ka jingialehkai senior kaba sha ka liang kadiang. (Ka thmu ban iashim bynta ha ka jingialehkai pyrthei lane international ha India ka ban sdang ha ka 27 tarik u October 2026).
Ka Olivia ka la batai ia ka jingeh ha ka liang ka pisa tyngka kaba pynlong ia ka jingiakhun kaba eh ka bai leit jingleit, ka bai tiket liengsuin, ka bam, bad kiwei kiwei ki jinglut. Wat hapdeng kane, kan dang bteng ban pyntbit bha na ka bynta katei ka lympung ïalehkai ha ka international bad ka kyrmen ba ka jingjop ïa ka takma hangtei kan wanrah ïa ka jingithuh ha ka ri. Ka la ong ruh ba kin don ki jingjied na ka bynta ka National Games 2027 ha u bnai November; lada ka shah jied, kan donkam ia ka jinghikai kaba kham bha, ka jaka ai jinghikai kaba biang bad ka lad ban lehkai, bad ki jingbam tei met. Ka la ban jur ba ka jingkhang lynti ia ka ka dei ka pisa tyngka, da kaba kdew ba ka hap ban siew wat na ka bynta ban pyndonkam ïa ka gym.
Ki nongkyrshan ba kongsan jong ka ki dei ki briew na ka shnong bad ka dong jong ka bad ka Elaka Sumer, kiba wat haba kim lah ban iarap pisa ki pynshlur ia ka.
Ka Olivia ka la kdew ruh ïa ki jingeh kiba don ha ka thaiñ ha East Jaiñtia Hills, kum ka jingduna ki lad ïoh kam ïoh jam bad ki jingeh kiba dang ïai bteng ha kaba ïadei bad ka jingtih dewïong. Ka la kyntu ia ki samla ba kim dei ban sangeh bad ban sdang ban trei sha ka thong jong ki.
Mynta u snem ka la long ka COC Champion jong ki Champion ha ka kyrdan jong ki samla. Ka la bynrap ba ka dei kaba ar kaba la bat ia ka nam COC ha India naduh u snem 1999.
