U Wanshwa Nongtdu uba dei u Spokesperson ka MCTODA, mynta ka sngi 22 tarik u Jylliew haba ai jingkren ha Madan bol jong ka Ladrymbai Dongwah, East Jaiñtia Hills District, ula ïaroh ïa ki nongïalam ka JCOMSWA kiba la shlur ban ïatai bad ïasait bad ki IAS officer ha Secretariat kumba 3 kynta eiei haduh ba u Chief Secretary ula hap ban sngap bad aiti ha uwei pat u IAS officer jong u.
Ban ïoh ïa ki Leader kiba shemphang bad ba shlur ha kane ka juk kaba mynta ka long kaba eh, lada ngim ïoh kum kine ki nongïalam kiba satar ‘naduh kato ka sngi 17 tarik ha Shillong ngi la shah rem lypa’, hynrei dei da ka jingshlur jong ki ula ai ka jingïaroh ïa ki da kaba pyrta lang lai sien ‘imslem JCOMSWA’.
Ka jingpynlong ïa ka jingshah thngan ka long kaba eh ïa kano kano ka kynhun ong u ma Wanshwa, hynrei kane ka jingïohi jngai jong u ma Marshall S.B Biam uba la shim ïa ka sien jam ban sangeh ka jingshah thngan lem bad ki dkhot da kaba shim da kawei pat ka lynti ka long kaba dei eh bad la kyntu ban nym shet kylla ïa u paidbah.
Naduh u snem 1984 la ïoh ban tip laidluid ïa u dewïong hynrei ha u snem 2014 la pynshitom ïa u paidbah bad mad shibun ki jingeh, kaba sngewsih ka long wat haba la don ka kynhun kaba la lum pisa ban ïakhun sha ïing kashari ban ïoh tih dewiong hynrei haduh mynta khlem ïoh report, ong shuh shuh u ma Wanshwa.
Ula kyntu ïa ki dkhot ka JCOMSWA wat suki ïaid shakhmat khnang ba ki paidbah kin ïadon lang ha syndah syndah, la lyntu ïa ki 4 ngut ki dkhot ka JCOMSWA kiba ïoh bynta ban ïadon lang haka Mining Policy jong ka MMDR ba kin kynmaw ïa ka nongrim kaba skhem katkum ka jingdawa ki paidbah.
Lada dei ka sorkar kaba shimkhia ula pynkynmaw ha u snem 2008 kila sdang ban wanrah ïa ki Cement Factory bad la sdang ban pyntreikam ïa ki minor bad major policy, hynrei ïa u dewïong ka sorkar kam pat lah ban thaw ïa ki kyndon treikam naduh bala shah khang. Kumta la dei ka por ïa ngi ki paidbah ka East Jaiñtia ban pynkhreh ïa ka Mining policy bad ban bishar ban peit bniah lang ïa ka.
Ula pynsngew ki nongmihkhmat ki trei tang na ka bynta 5 snem ka samoit, hadien kata mano ba pynïaid ïa ka kam ki dei ki IAS bad ka jingkhot mynta ka long lyngba ka jingshlur ki paidbah lyngba ka jingïalam ka JCOMSWA ban mih ïakhih na ka liang ka sorkar kala pdiang ïa ka jingdawa.
‘Kano kano ka jingïaleh ka shnong ha ka bor ki paidbah, wat u Symbud myntri rangbah ka sorkar jylla ula pynbna sa lai bnai la plie ïa ka jingtip dewïong kane ka paw ïaka dak ka shim namar ki nong East Jaiñtia kila long kiba stad da ka jingtip ïaka aiñ’. Ula kitbok kitrwiang ïa ka JCOMSWA da kaba kular ban ïatreilang ban mih shakhmat na ka bynta ka thaiñ East Jaiñtia Hills.
Ula pynsngew ruh kala don ka jinglilam (auction) ïa u dewiong haduh 2 lak matrik ton bad ïa ka Challan yn sa pyllait ha kine ki sngi ban wan, hynrei lada ym plie lang ïa ka kam tih dewïong ngin ym shah ban shalan ïa utei u dewïong ban lilam.