Ka Dorbar ki Waheh Kur Ri Jaintia ha ka jingïalang bad ki President, General Secretary jong ka JSU, JNC, JSM, WJSU, Synjuk Waheh Chnong Ri Jaintia, Synjuk Waheh Chnong Jowai, ki nongïalam jong ki seng kur kaba la long ha ka 22/06/26 ha Jowai, ka la pynpaw ïa ka jingsngew khia kaba jur bha ba u Ma Thombor Shiwat, CEM bad ka EC JHADC ki kloi ban pdiang bad ithuh shwa da ka jingthoh ïa ki kur jong kiwei pat ki jaitbynriew, katba ïa ka Jait ka Kur lajong na ka kmie ki hun ban ym leh kano kano kumba la buh jingkyrpad na ka por sha ka por da ka Dorbar ki Waheh Kur Ri Jaiñtia.
Kane ka jingleh jong u CEM bad ka EC JHADC ka la pynmong ïa baroh ha kaba la rai ban kyrpad ïa u CEM JHADC ban pynsangeh pyntreikam shi syndon ïa ka jingthoh (Notification) kaba la pynmih da ka Secretary JHADC bad buh ryntih ne thaw aiñ shwa ïa ka jait ka kur na ka Kmie. Ïa kane dei ban pyntreikam ha lane shwa ka 30/06/2026 kumba la dep ai jingthoh na ka Dorbar ki Waheh Kur Ri Jaiñtia.
Lada u CEM bad ka EC JHADC kim ai jubab hapoh ka por ba la buh, kumba la kyrpad, na ka liang jong ki Waheh Kur shynrang bad kynthei ryngkat ki seng bhalang, ki Synjuk Waheh Chnong kin sdang noh ia ka jingiakhih naduh ka 02/07/2026.