Ka Jaintia Students Movement (JSM), Central Executive Committee ka pynpaw ka jingsngew nguh ba kyrpang ia ka Executive Committee jong ka JHADC ha ka jingialam u CEM Bah Thombor Shiwat, namar ka jingpdiang ia ka jingdawa ba la rah lyngba ka Memorandum ba la aiti sha ka Council na ka bynta ban thaw ia ka ‘Jaintia Hills Autonomous District (Registration & Protection of Clans) Act, 2026’ katkum ka Para 3(1)(b) jong ka Sixth Schedule.
Kane ka rai, kaba la pyntip lyngba ka shithi http://No.JHADC/POL/61/2025/17 dated 26/06/2026, ka wan hadien ba ka JSM ka la ai jingkyrshan pura ia ka rai ba la shim da ka Dorbar Waheh Kur Ri Jaintia ha ka Annual General Meeting ha ka 13/06/2026 ha Chilliangraij.
Katkum ka Article 244(2) ryngkat bad ka Para 3(1)(b) jong ka Sixth Schedule, ka JHADC ka don ka bor ban thaw aiñ halor ka “inheritance” bad “social customs”. Ki kam Kur, ka jinghiar pateng, ka bor ka Dorbar Kur, bad ka jingiada ia ka jaka pateng kiba hap beit hapoh kane ka bor.
U Heihokmi Supuh, Publicity Secretary u la ong ba na ka liang ka JSM ka kyntu ia ka JHADC ba kan thaw noh ia ka “Jaintia Hills Autonomous District (Registration & Protection of Clans) Act, 2026” shuwa ban wanrah ia ka Draft Bill ha ka Dorbar ban wan, bad ba kan pynlong ia ka jingialang iamir jingmut bad ki Waheh Kur bad ki Dorbar Tynrai haba thaw ia ka Bill.
U la iaroh ia u CEM Bah Thombor Shiwat bad ka EC kaba la pynpaw ia ka jinglakloi ban iada ia ka riti ka dustur. Kane ka Aiñ kan iada ia ka ‘Kur Tre Ri’ – ki Kur Tynrai ba hiar pateng na ka Kmie (Bei), kan pynkhlaiñ ia ka Dorbar Kur, kan buh ia ka Bor u Rangbah Kur, bad kan iada ia ka Kur na ka bynta ki pateng ban wan.