Kumba ju long shisien shisnem ka jingleit ‘riewblei (Pilgrimage) bad ka jinglehburom ia ka Dohnud bakhuid tam U Jisu nalor ba man la ka Parish ki don ka Iingmane kaba la ainam ha ka Dohnud Bakhuid tam U Jisu bad kum ka Diocese pat ia kane ka Iingmane kaba la aiti bad ainam ha ka Dohnud bakhuid tam U Jisu ka dei ka Iingmane ka Balang shnong Myndihati kaba hapoh ka Parish Khliehriat, East Jaintia Hills District.
Ia kane ka jingleit ‘riewblei ha ka Dohnud bakhuid tam U Jisu, ka Diocese Jowai ka la pynlong ha kane ka 28 tarik Jylliew 2026 ha kaba da ki hajar ngut ki paidriewngeit na ki 18 Parish jong ka Diocese ki la iatuid sha Myndihati ban lehburom ia ka Dohnud bakhuid tam U Jisu. Ha kane ka jingleit riewblei ki Parish kiba na West Jaintia Hills kum juh ki Parish ka East Jaintia Hills kum ka Ladrymbai, Ladlakadong, Sutnga bad Jalaphet ki ia kynduhlang ha Don Bosco College bad sdang ka jingiaid proseshon haduh ban da poi top ha Myndihati ha kaba don ka Iingmane kaba la aiti kyntang bad ainam ha ka Dohnud bakhuid tam U Jisu bad ki Parish kum ka Umkiang, Lumshnong bad kiwei ki sdang ka jingiaid proseshon jong ki shwa ban poi ka shnong Myndihati.
Ha kane ka jingleit riewblei ki don ruh ki parabangeit kiba pynshitom ialade da kaba shah jingit, kiar na ka bam ka sa bad da kaba iaid kjat kum na ka Parish Yongshiwiat (West Jaintia Hills na par Mynkhen) kaba jngai tam spah Kilometer haduh Myndihati. Ha kane ka jingleit riewblei da ki spah ngut ki paidriewngeit ki pynthymmai iala ka jingim mynsiem da kaba shim ia ka Sakrament ka jingkylla ka bamut bad la ioh ruh ia ka sneng ka kraw kaba sngewtynnat bad ka Khanatang (Parom) shaphang ka Dohnud bakhuid tam U Jisu da u Phadar Rev.Fr. Richard Shylla, phadar synrop ka Parish Jowai.
Ha ka nohphai sngi shwa ban pynlong ia ka jingkñia Mass bakhuid la pynlong ia ka jingiaid proseshon na Sacred Heart Secondary School, Myndihati sha Iingmane da ki Nongrah Diengphna bad ka Band ki Samlalud (Kynthei) jong ka Sacred Heart Secondary School Myndihati bad ki sur tem batbit bad bashoh mynsiem kiba iadei shaphang ka Dohnud bakhuid tam U Jisu ka la ktah bad pynlung mynsiem ia kiba bun ki paidriewngeit
Ia ka jingkñia Mass bakhuid bad ha baroh ki jinglehniam la lamkhmat da u Most Rev. Ferdinand Dkhar dd, Bishop ka Jylla Niam Jowai ha ryngkat ka jingiasynran ki Lyngdohsohblei (Phadar) na ki Parish jong ka Diocese.
U Bishop Ferdinand haba kren ha kane ka sngi u la ai ka jingkren kaba sngewtynnat shaphang ka Dohnud bakhuid jong u Jisu ba ka long ka Dohnud kaba jemnud, kaba sngewrit, kaba iaishah, kaba dap da jingmap ei kaba khlem buh kyndon bad kaba dap da ka jingisynei ia ki briew baroh khamtam ia kito kiba khot kyrpad ia ka jingisynei jong u.
Ha kane ka sngi u Bishop Ferdinand Dkhar u la pynkupbor ruh ia ki katto katne ngut ki Rangbah bad ki longkmie kum ki dkhot jong ka Family Commission jong ka Jowai Diocese.
