Ka khubor Pulit kaba la phah la iathuh ba ha ka miet jong ka 27 tarik mynta u bnai ha ka por kumba 8:30 ei ei kala don ka jingshah iuh kali u wei u briew ha shnong Pamchyndat ha Rymbai, East Jaintia Hills District bad ka kali ba leh ia kane kala phet krad hadien kane ka jingjia.
Ki Pulit jong ka Ladrymbai Out Post hadien ba kila ioh jingtip ia kane kila leit mar mar sha katei ka jaka ba jia kane ka jingjia. Haba la poi ha kane ka jaka kila lap ia kane ka met iap jong u shynrang briew kaba la thiah lyngkthar ha surok, kila pynlong ia ka jingtohkit hynrei ia une u briew ym lah ban ioh kyrteng ne don ba ithuh namar ba ka bynta jong ka khlieh jong u kala pra lut khait.
Hadien ba ki Pulit kila pyndep katkum ki kyndon jong ka aiñ la leit pynkit noh ia katei ka met iap sha Civil Hospital, Khliehriat ha kaba la buh ia ka ha ka jaka buh metiap na ka bynta ban wan ithuh ne shimti da kiba haïing hasem.
Shuh shuh na ka liang ki Pulit ka East Jaintia Hills District lyngba u SP ula kyntu ia ki nongshong shnong ban ai jingtip lada ki dong jingtip ei ei shaphang une u briew uba la khlad ne kiba haïing hasem jong u.
Ki Pulit ki iathuh ba une uba la khlad u don ka jingjrong kaba 5 phut eiei, u phong da ka T-shirt rong Navy Blue, ka patlun lyngkot rong Blue (Adidas), ryngkat ki sliper rong lieh (Equlite).