Ka Jaiñtia Students’ Movement (JSM) ka la shim khia bha halor ka jingïakajia kaba dang ïaid hapdeng ka East Jaintia District Cricket Association (EJDCA) bad ka Ladrymbai “B” Sports Club halor ka District League 2026.
Na ka liang ka seng ka sngewkhia jur ba lada kane ka jingïakajia ka dang bteng, kan wanrah tang ka jingrem, ka jingduh jingkyrmen bad ka jingsngewsih ïa ka kynhun cricket jong ka East Jaintia Hills. Ka long kaba pynsngewsynei ban ïohi ïa ki club bad ka Association ba ki jingïaleh pyrshah para ma ki, katba ka jingthmu kaba kongsan ka dei ban tei ïa ka lawei jong ki samla.
Ka jingïalehkai kam dei ka kam khaïi, hynrei ka dei ka lawei jong ki samla. Ka Cricket ka long ka rynsan ïa ki nongïalehkai samla ban san, ban don jingphohsniew bad ban mihkhmat ïa ka District bad ka Jylla. Kam dei satia ban kylla long ka jaka jingïaknieh nam ne jingshim kabu halor ki jingmyntoi shimet, ong ka seng.
“Ngi kyrpad jur ïa ka EJDCA ban sdang ïa ka jingïakren bad ban wad ïa ka jingïapynbeit kaba hok bad kaba shai bad ka Ladrymbai “B” Sports Club. Kine arliang mamla ki dei ban wan sha ka miej jingïakren da ka mynsiem jingïalehkai. Ka Association ka dei ban pynshai ïa ki Rule 16 bad 17, ban pyni ïa ki rekod jong ka jingïalang kaba 8 tarik Jylliew, bad ban jubab balei la pynkynriah ïa ka Final sha Ri-Bhoi. Lada ym lah ban pynkut ïa kane ka jingïakajia, ka cricket arena ha East Jaintia Hills kan julor. Ki samla kin duh jingïashim bynta, ki club kin duh jingshaniah, bad ka jingtrei shitom jong ki nongïalehkai kan long lehnohei. Ngim lah ban shah ba ki jingphohsniew jong ki samla cricketer kin jot noh”.
U Sports Secretary jong ka JSM u la ong, “Ngi kyrpad ïa u President, Secretary bad Tournament Committee jong ka EJDCA ban shim mardor ïa ki sienjam ban wanrah ïa ka jingïasuk. Ngi kyrpad ruh ïa ka Ladrymbai ‘B’ Sports Club ban long kiba kloi ïa ka jingïakren na ka bynta ka bha ka miat jong ka jingïalehkai. Ka Jaiñtia Students’ Movement ka la kloi ban long kum ka nongpynïasuk kaba laitluid lada baroh arliang mamla ki mynjur, khnang ba ka jingsuk bad ka hok kan wanphai biang sha ka cricket ha ka district jong ngi”.
Kane ka long kat kum ka jingpyllait khubor jong u Kyrmen Kyndait, Sports Secretary, Jaiñtia Students’ Movement, Central Executive Committee.