Ka Umsning Block Headman Forum (UBHF) ha ka 30 tarik Jylliew 2026 ki la wan ban kynduh ia u Myntri ka tnad ka koit ka khiah u Bah Wailadmiki Shylla ban iakren ha kaba iadei bad ka jingduna treikam hapoh ka Umsning CHC.
Haba kren sha ki lad pathai khubor u President jong ka Umsning Block Headman Forum u Bah Franky Nongrum u la ong naduh ba la kyntiew kyrdan ia ka Umsning PHC Sha ka CHC shibun ki nongsumar ki iakynduh jingeh na ka jingbymdon ka jaka thiah pang na ka bynta ki Shynrang ha katei ka CHC.
Nalor kata u la pynpaw ruh haba iadei bad ka jingdon ki Doctor ha katei ka CHC ka duna bha khamtam katei ka CHC kaba ai jingshakri ia kumba 200 tylli tam ki Shnong kiba don ha Umsning Konsitituensi. U la kyntu ia ka Sorkar ba kan shimkhia bad ban pynbiang ia ki Doctor kham bun kumba 6 ngut ei ei khnang ba kan nym ktah ia ka jingwan shah sumar ki nongpang ha katei ka CHC.
Shuh shuh u la bynrap ba bun na ki nongpang ki hap ban leit leh ia ki test shabar na katei ka CHC namar ka jingbym biang ki Machine ne ki jaka test ha katei ka CHC bad kane ka wanrah jingeh ia kiba bun khamtam kiba wan na ka long ïing ba duna ka jingioh jingem.
U President u la pynpaw sha ka Sorkar ba kan ai jingiarap lyngba ka Smart Card khamtam ia ki longïing baduk haba iadei bad ka jingleit test ki nongpang sha kiwei ki jaka ki bym don jaka test ha katei ka CHC.
Shuh shuh na ka liang u Bah Franky u la pyntip ba ka Umsning Block Headman Forum ka kyntu ia ka Sorkar ba thaw thymmai noh ia kawei ka PHC ha Kyrdemkulai bad kumjuh ban kyntiew kyrdan noh ia ka Umsawlum, Mawlyndep or Mawlang Sub Centre sha ka PHC khnang ba man wanrah jingmyntoi ia ki shnong kiba marjan bad kumjuh khnang ba kan ym wanrah jingkhia ia ka Umsning CHC.
Kumta ban iarap ia ki nongpang ha ka jingdonkam kyrkieh ia ka snam ka Umsning Block Headman Forum ka kyntu ia ka sorkar ba kan buh noh ia ka Mobile Blood Donation Vehicles khnang ba kan long ka jingmyntoi ia ki paidbah ba kim donkam shuh ban leit sha hospital lada donkam snam lyngba ka Mobile Blood donation Vehicles.
Na ka liang u Myntri ka tnad ka koit ka khiah u Bah Wailadmi Shylla u la kular hakhmat ki kynhun ka Umsning Block Headman Forum ba un sa shimkhia ia ka jingpynsngew ka Umsning Block Headman Forum haba iadei bad ka jingdonkam ha ka CHC Umsning bad ha kiwei ki jaka Sumar kiba hap ha Umsning Konstituensi bad u Myntri ka tnad ka koit ka khiah u la kular ruh ba un sa leit ban jurip ia ka Umsning CHC ha kine ki khyndiat por ban wan.