Ki Jaitbynriew Tiwa Ialung kiba don hapoh ka jylla Meghalaya ki la pynpaw ia ka jingsngewdiaw hadien ba Kim shym la ioh ia ka jingithuh kum ki Schedule Tribe hapoh ka jylla la palat da ki phew snem.
Haba kren sha ki lad pathai khubor na ka Liang u General Secretary ka All Tiwa Students Union u Bah Albert Dilar u la ong ba ki jaitbynriew Tiwa Lalung ki la don ha kane ka jylla naduh ka por ba synshar ki phareng bad ki la ioh ia ka jingithuh kum ki Schedule Tribe ha ki por mynshwa hynrei hadien ba la ioh ka jylla Meghalaya kim shim la ithuh shuh ia ki kum ki Schedule Tribe bad kane ka pynlong ia ki ban pynpaw ia ka jingsngew diaw ba kim shym la ioh jingithuh kum ki Schedule Tribe.
Nalor kata u la ong kane ka mat jingdawa ban pynrung ha ka Schedule Tribe ia ki jaitbynriew Tiwa ka la slem bha naduh ka por ba dang long Myntri Rangbah u bah E K Mawlong bad kumjuh ki la phah ruh da ka jingthoh sha u Syiem ka Hima Khyrim ban ithuh noh ia ki kum ki Schedule Tribe hynrei haduh mynta kim shim la ioh jingithuh kum ki Schedule Tribe hapoh ka jylla Meghalaya.
U General Secretary u bah Albert Dilar u la pynpaw ruh ba ki jaitbynriew Tiwa ki ioh ban thep vote ha ki elekshon MLA bad MDC bad kaba sngew lyngoh ka long kim shym la ioh jingithuh kum ki Schedule Tribe hapoh ka jylla Meghalaya.
U la bynrap ruh ba ki jaitbynriew Tiwa Lalung ki la pynsngew ruh sha kane ka Sorkar ba mynta hapoh ka jingialam u Conrad K Sangma hynrei na ka liang ka Sorkar ka pyntip bad pynpaw ba kan sa peit ia kane ka kam halor ka jingdawa ki jaitbynriew Tiwa Lalung ban ithuh noh bad pynrung ia ki ha ki Schedule Tribe ha jylla.
Khatduh u la kyntu ia ka Sorkar ba mynta hapoh ka jingialam u Conrad K Sangma ba kan sngap bad ban pynrung noh ia ki Tiwa Lalung ha ka Schedule Tribe hapoh ka jylla Meghalaya bad kumjuh ban pynrung bad kynthup ia ki hapoh kane ka Census 2027 namar kane ka dei ka mat jingdawa kaba la neh slem bha la ong u General Secretary ka All Tiwa Lalung Students Union u bah Albert Dilar.
