Ka Shad Behdeiñkhlam kaba ‘saw sngi lai miet’ ka la sdang naduh ka 6 tarik mynta u bnai kaba dei ka sngi Pynsiñ hapdeng ka jingiphuh iphieng ha ryngkat ka jingrisa bad ka jingud ka Bom ka Bhuri kaba la ïashim bynta da ki khun ka Chilliang Raij (Khon Raij) kiba la leit rah na khlaw ïa ka “Symbood Khnong” bad pynpoi ïa ka ha ‘Tre Kjat Loomsooïung’ New Hill Jowai.
Ïa ka shad shad Behdeiñkhlam la sdang naduh ka por mynstep ba la don ka bam Tyngkong ha ‘Iung Langdoh’ nangta ki khun ka Seiñraij Jowai kila pynkhreh ïa ka Siang ka Pha ban pyndep da ka kmie jong ka ïing kum ka jingburom ïa kiba la khlad noh na sla jong kane ka pyrthei.
Katba ha ka por janmiet ki khun ka Chilliang Raij (Khon Raij) kila leit rah na khlaw ïa ka “Symbood Khnong” ha ryngkat ka shad ka kmen, ka pud ka tem ha shi lynter lynti haduh ban da poi ha Loom Soo ïung, New Hill Jowai.
Ha ka sngi ba ar kaba dei ka ‘Mulong’ jong ka 7 tarik naduh ka por mynstep u Dolloi, u Langdoh bad ki Waheh Wasan kin sdang ïa ka nguh ka dem ha ka “Syiem Aitnar” hapoh ka jingpynlut pynsep jong u Dolloi.
Ha ka por janmiet baroh ki Kmai Raij kin pynpoi ïa ki Deiñkhlam ha Iawmusiang ha ryngkat jingshad jingkmen, katba ki khun ka Raij kin pynpoi ïa ka ‘Khnong Blai’ ha Loo Sooïung.
