Ka Samla Aishwariya Malang kaba dei kawei na ki nong Shong Shnong ka Khliehiongriang Jowai kan leit ban mih khmat ia ka jylla ha ka Sien kaba nyngkong eh ha Jaipur kaba la tip kum ka Miss Teen Deva ka ban sa long naduh ka 11 tarik haduh 19 tarik Naitung 2026.
Haba kren sha ki lad pathai khubor ka Samla Aishwariya Malang ka pynpaw ia ka jingsngewnguh bad sngewkmen ia ka ïing ka sem kiba la ai jingkyrshan naduh kaba sdang bad kumjuh haba iadei bad ka jingleit iashimbynta ban mihkhmat ia ka jylla sha ka Miss Teen Deva ha Jaipur ka ban sa long shen naduh ka 11 tarik haduh 19 tarik July 2026.
Nalor kata ka la ong haba iadei bad ka lynti iaid ha ka jingim jong ka, ka la sdang ban iashim bynta ha ki rynsan bapher bapher naduh ba ka dang dap 10 snem ka rta bad ka la iashim bynta ruh ha ka Miss Teen Jowai Pageant ha ka por ba dang don 14 snem bad kumjuh ka la iashim bynta ruh ha ka Miss Teen Jaintia.
Shuh shuh ka la ong kane ka dei ka sien kaba nyngkong eh ban leit mihkhmat ia ka jylla sha kane ka rynsan National Pageant bad ka thong ka long ban ioh kheit ia u soh ka jingjop bad wanrah nam ia ka jylla Meghalaya bad ki nong iashim bynta ha kane ka rynsan ki don kumba 39 ngut kynthup na kiwei ki jylla.
Khatduh ka la kyntu ia ki paidbah ka jylla Meghalaya ba kin ai jingkyrshan lem ia ka ha kane ka jingleit iashim bynta sha ka National Pageant ha Jaipur bad ka la kyntu ruh ia kiwei ki samla kiba don ia ka thong ba kin mih shakhmat bad shaniah ha lade ha ryngkat ka jingkyrshan na ka ïing ka sem la ong ka samla Aishwariya Malang.