U President ka Hills State People Democratic Party HSPDP u Bah KP Pangiang u la ong ba ka Seng HSPDP ka pyrshah jur ban tih ia u Uranium ha ka jylla.
Haba kren Sha ki lad pathai khubor u President ka HSPDP u Bah KP Pangiang u la pyntip ba naduh ki por ba dang long President u (L) Hoping Stone Lyngdoh ka Seng ka pyrshah jur ia ka jingtih Uranium ha ka jylla.
Nalor kata u la pynkynmaw ha u snem 2016, ha ka por ba synshar ka MUA-2 ha ka por ba long Myntri Rangbah u Dr Mukul Sangma u la ong ka Seng ka la phah da ka jingthoh ha kito ki snem bad ka Sorkar jylla ka la pynduh lut ia ki mat haba iadei bad u Uranium ha South West Khasi Hills.
Shuh shuh u la ong ba ha kata ka por ka la long ka jingjop ia ka Seng HSPDP hadien ba ka Sorkar ka la weng bad ka la pdiang.
Ha kine ki sngi ka la don biang ka jingiakren haba iadei bad ka mat Uranium hynrei ka Sorkar hapoh ka jingialam u Myntri Rangbah u Conrad K Sangma u la pynpaw ba kan nym don kano kano ka jingiakren haba iadei bad ka Kam tih Uranium.
Khatduh u la ong ba ka Seng ka ai khublei bad pynpaw ka jingsngewnguh ia u Myntri Rangbah ka jylla u Conrad K Sangma uba la pynpaw ba kam don kano kano ka jingiakren haba iadei bad u Uranium.