Ka Khasi Students’ Union (KSU), Mangalore Unit Ka Sngewkmen ban pyntip paidbah ba ka 3rd Hynñiewtrep Sports Meet 2026, kaba la long ha ka 5 tarik u Naitung (July) 2026 ha Milagres Ground, Mangalore, ka la poi sha kaba kut da ka jingjop kaba pura.
Ha kane ka sngi, la wan ban long u Kongsan da u Samla Donboklang Nongphud, President ka KSU Bengaluru Unit, uba la ai jingkren halor ki bynta kiba kongsan kiba ïadei bad ka bha ka miat jong ki Hynñiewtrep kiba shong bad trei ha Karnataka.
Ha ka jingkren jong u, u la kyntu ïa baroh ki khun ka Bri u Hynñiewtrep kiba don ha Karnataka ba kin ïa tylli, ïa snohkti lang bad jingïarap mar kylliang, namar haba im shabar ka jylla, ka jingïatylli ka long kaba donkam tam ban ïada ïa ka jinglong tynrai, ka hok bad ka bha ka miat jong ka jaitbynriew.
U la kyntu ruh ïa ka Sorkar Meghalaya ba kan shimkhia ban pynurlong kloi ïa ka Meghalaya House ha Bengaluru, namar kane kan long ka jingïarap kaba khraw ïa ki samla pule, ki nongtrei, ki nongpang bad baroh ki nong Meghalaya kiba don ha Karnataka.
Shuh shuh, u la pynpaw ïa ka jingsngewkhia halor ka jingbun ki samla bad ki paidbah na Meghalaya kiba wan sha Karnataka ban pule bad trei. U la ai jingmut ba shuwa ban wan sha Karnataka, dei ban bishar bha ïa ki jingïohkam, ki jaka pule, ki agency bad ki jaka sah, namar ha kine ki sngi la jur bha ki kam thok bad ki scam. U la kyntu ïa baroh ba kin long kiba husiar bad kiba peitngor.
Ka KSU Mangalore Unit ka ai khublei kyrpang ïa baroh ki dkhot, ki nongkyrshan, ki paidbah, ki riew rangbah, ki volunteer, khamtam iaka KSU Sengkmie ba ju don lang bad iarap iangi ha mynla ki por bad baroh kiba la ai ka jingïatreilang kaba pura ban pynlong ïa kane ka Sports Meet kaba jop. Ka jingïashim bynta shitrhem jong phi ka pyni ïa ka mynsiem jong ka jingïatylli bad jingïaieid para Khasi.
Ka Seng ka ai ruh ka jingïaroh bad jingïakhublei ïa baroh ki nongjop bad ïa baroh ki kynhun kiba la shim bynta ha ka jingïalehkai bad kiba la pyni ïa ka jingiatreilang, ka akor bad ka jingïalehkai kaba khuid.
Ki Nongjop ha ka Football Tournament
- Champion: Handsome FC
- Runner-up: Jaintia FC
Ka Khasi Students’ Union Mangalore Unit kan bteng ban trei shitom na ka bynta ban pynskhem ïa ka jingïatylli, ban ïada ïa ka jinglong tynrai bad ka hok jong ka jaitbynriew Hynñiewtrep, bad ban kyntiew ïa ki kam jingïalehkai kiba wanrah ïa ka jingïadei paralok bad ka jingïalong kawei.
