Mynta ka sngi (12-07-2026) ka shnong Panaliar, Jowai kala ioh ban plie ia ka Indoor Sports Games Complex jong ka, kaba don ha Kperlyngktuiñ Parliar, ha kaba u MLA ka thaiñ u ma Wailadmiki Shylla, u ba dei ha ka juh ka por u Myntri sorkar ba dei peit ia ka Sports & Youth Affair, Health & Family Welfare bad Home (Possport) u la long u Kongsan, katba u ma Khroobok Passah, Assistant Director Sports & Youth Affairs u long kum u Symbud Kongsan.
Ka la don ka jingialang kaba lyngkot kaba la pyniaid da u Waheh Shnong ka Panaliar u ma Riquoma Rq. Laloo ha kaba la ioh ia ka jingnguh blei da u ma Jait Dao Sumer uba dei u Chairman ka Local Committee ka shnong.
Na ka liang jong u kongsan ma Wailadmiki Shylla ula plie pyrda ia u Mawsahkynmaw jong kane ka Complex. Haba ai jingkren u ma Wailadmiki u ong ba na ka liang jong u, u la pyrshang katba lah ban pynioh ia ki lad jingiarap ia ka shnong Panaliar, mynta ruh ka dang don ka jingthmu ban pynbeit ia u pud u sam hapdeng ka shnong bad ka MCH. U ma Wailad u la buh ka jingkyntu ia ki khun jong ka shnong ban shim ia ka kabu ban kyntiew shaphrang ia ki kam ialehkai (Sports). U la pynkynmaw rh ba u la iarap ha kaba pynbha pynmiat ia ka madan ialehkai Football jong ka shnong, u la khot ia ka jingiatreilang hapdeng jong u bad ki nongialam shnong khnang ba yn lah ban pyndep ia kino kino ki kam kiba la thmu ban pyndep. Na ka liang jong u ma Wailad u la kular ban iarap pisa haduh Rs.10 lak tyngkat na ka bynta ban pynbha ia ka Indoor Hall jong ka shnong Panaliar.
Kham hashwa ia kane la ioh ia ka jingkren na u ma Samehi Laloo, uba la iathuh ia ka jingiaid lynti jong ka shnong naduh kaba sdang ban shna ia kane ka Indoor Hall. La iathuh ruh halor ka jingiarap kaba la ioh lyngba ki skhim bapher bapher ia kiba la ai da u Dr. Wanweiroy Kharlukhi, MP Rajya Sabha kaba Rs.10,00,000/-, na ka ophis u Lat (Governor) ka jylla hapoh ka jingialam lynti u ma Antonio Lakiang Rs.7,00,000/-, na u ma Sniawbhalang Dhar, Dy. Chief Minister ka jylla Rs.5,00,000/- bad na u ma Wailadmiki Shylla MLA ka thaiñ Rs.5,00,000/-.
La ioh ruh ia ka jingkren kyrkhu kyrdoh bad ka jingkyntu ia kiba wan ialehkai sha kane ka Indoor Hall da u ma Khroobok Passah. U la kyntu ban long kiba lehkhuid ia kane ka jaka bad u la ong ba un pyrshang ban wad ki lad ki lynti lyngba ka tnad Sport ban pynioh jingiarap ia ka shnong Panaliar.
Ia ki kyntien ai khublei la ai da u ma Marryngkat Syngkon, General Secretary ka Shnong Panaliar Jowai.
