Ka Meghalaya AIDS Control Society, Shillong ha ryngkat ka jingiatreilang bad ka ophis u Deputy Commissioner, East Jaintia Hills District bad ka ophis District Medical & Health Officer (DM&HO), East Jaintia Hills District, ka la sdang ia ka Integrated Health Campaign (IHC) kaba 3 (lai) bnai lynter hapoh ka District, ia kaba la wan ban plie sdang da ka MLA jong ka Sutnga-Saipung ka kong Santa Mary Shylla ha ka prokram kaba la pynlong ha shnong Dkhiah East, East Jaintia Hills District.
Ha kane ka prokram la iadon lang ka Assistant Commissioner, East Jaintia Hills District ka kong F. Wann, i Project Director, Meghalaya AIDS Control Society, Shillong, Dr K.L Iawbor, ka District Social Welfare Officer (DSWO), East Jaintia Hills District, kong R Bareh, ka Secretary District Legal Services Authority (DLSA), East Jaintia Hills District, kong B. Kharbithai, u Block Development Officer (BDO) Saipung Block, Dr R. Pyrtuh, u Block Development Officer (BDO) Lumshnong, C&RD Block, ma M. Kyndait, ki jongtrei jong ka koit ka khiah bad ki nongshong shnong ka thaiñ.
Haba ai jingkren ka kong Santa kala ong ba kane ka Integrated Health Campaign (IHC) ka long ka wei na ki prokram kaba iarap bha ban pynioh ia ka jingkoit jingkhiah jong ki nongshong shnong khlem kano kano ka jingsiew dor haba pynlong ia ki test khamtam ha ka jingiadei bad ka jingpang HIV.
Ka kong Shylla ka ong ba ki briew kiba don ia une u khniang jingpang HIV ka pyntlot ia ka bor met bad ki lah ban shah ktah kloi na kiwei pat ki jait jingpang. Ka ong ba ka la long kaba donkham bha ban don noh ia ka Antiretroviral Therapy (ART) Centre hapoh ka District, ka ong ruh ba ka jingiohlad jong u khniang jingpang HIV ban saphriang ka dei na ka jingkheiñ sting hi jong ki briew, kumjuh ka jingsngewthuh bakla kaba la pynlong ia ki ban kyntait ban leit phah test ialade.
Kumta ka kong Shylla ka khot bad wer ia ki nongshong shnong ban long kiba iatreilang ban iada na ka jingsaphriang jong une u jait khniang (HIV) bad ban pynduh jait shi syndon ia kane ka jait jingpang napoh ka District.
Na la liang ka kong F. Wann kala pynpaw ka jingsngewnguh ia kine ki tnad sorkar kiba la kloi ban pynlong ia kum kine ki prokram kiba kongsan bha. Ka ong ba ka East Jaintia ka dei kawei na ki District ba don bun u ne u khniang jingpang. Kumta ka la khot ia ki riew paidbah ba kin sngewthuh shaphang kane ka jingpang HIV bad AIDS da kaba wan shakhmat ban phah test ialade khlem kano kano ka jingbuhteng.
Ka kong Wann ka ban jur ia ka jingshimkhia jong ki nongialam shnong, ki nongialam niam bad ki Self Help Group na ka bynta ban ai ka jingpynsngewthuh bad ka jingpynshai paidbah khnang ba ki briew ki mih hi dalade ban leh ia ka test HIV. Ha kane ka prokram IHC kan kynthup ruh ia ka jingtest ia ka jingpang Tuberculosis (TB), Diabetes, HIV, Syphilis, ki jingpang khmat, pang bniat bad kiwei de ki jingpang bym iabit. Ha kajuh ka por yn pynlong lang ia ka jingpynrung Aadhaar, ka jingpynrung MHIS Smart Card bad kiwei de ki prokram kiba lah ban ban ai jingmyntoi ia ki paidbah kiba la ai da ka sorkar.
