Mynta ka sngi 28 tarik u bnai July 2026, u bah Reachingson Siangshai, u nongwad RTI na EJHD, u la ia kynduh bad ai ia ka memorandum sha u Deputy Commissioner ka EJHD uba dei ruh u Chairman jong ka DSC ban dawa na u ban sdang noh ia ki bynta ba dang sah jong ka Recruitment process ha kaba ia dei bad ka Advertisement kaba la pynmih naduh u bnai October 2025.
U bah Siangshai u la pyntip ruh ba ka DSC ka la pyntip sha u ha ka 18 March 2026, ba kin pyndep lut (tentative recruitment schedule) ia baroh ki bynta (procedure) jong ka Recruitment Process ha u bnai April-May 2026, hynrei haduh mynta kim pat sdang.
U la buh jingkylli ruh balei ka DSC ka shim por palat 6 bnai ban pyndep ia ka Recruitment process, namar katkum ka Standard Operating Procedure (SOP), kaba la pynmih da ka Personnel & Administrative Reforms (B) Department jong ka Sorkar Jylla, lyngba ka OFFICE MEMORANDUM kaba la pynbna naduh 18 July 2024, ka point number 5 ka kdew shai ba ki Recruiting Agencies (DSC, MPSC & kiwei kiwei) ki dei ban pyndep & pynbna ia ka Final Result hapoh 6 bnai naduh ba la advertised. Te mynta ka la palat ia ka hynriew bnai, bad u la thoh ruh ha ka Memorandum da kaba ai por 30 sngi ia ka DSC ban pyndep ia ki bynta ba dang sah jong ka Recruitment Process.
U bah Siangshai, u la pynkynmaw ruh ia ka DSC ban pyntreikam ia ki rai ban pynbha ia ka rukom treikam & rukom pyniaid ia ki bynta bapher bapher jong ka Recruitment Process, kaba la shim ha ka jingialang kaba la long ha ka 27 November 2025 da kaba iadonlang u nongiasaid aiñ ba paw khmat na ka District u ma Kerlang Ksoo, ki ar ngut ki MLA (Kyrmen Shylla & Santa Mary Shylla), ki MDCs, ki Head of Institutions, ki dkhot ka DSC & kiwei kiwei na ka District, kaba la pyniaid da u DC ha kito ki por.
Ula pyntip ruh ba u DC u la kular ban sdang hapoh katei ka por, bad la kyntu ia kiba la applai ban long kiba la pynkhreh bad u la kitbok kit rwiang ia ki ruh.