Mynta ka sngi ka 29 tarik u bnai July 2026, ka Meghalaya Indigenous Women’s Council (MIWC), lyngba ka President ka kong Bythygrace Dkhar, ka la aiti ia ka dorkhas sha u Deputy Commissioner jong ka East Jaintia Hills District, u Shri Manish Kumar, IAS, da kaba pyrshah ia ka jingthmu ban shna Cement Plant bad ban tih mawshun da ka Shree Cement.
Haba kren sha ki lad pathai khubor hadien ka jingiakynduh ia u Deputy Commissioner ka kong Dkhar ka la ong ba ka pyrshah ia ka jingpynsngew paidbah kaba la buh ban long ha ka 31 tarik mynta u bnai ha Lum Syrman, Daistong. Ka la ong ba ka jingdon jong ka kompeni ha ka distrik ka la wanrah shibun ki jingeh ia ki briew trai shnong, kaba ktah ia ka koit ka khiah, ka mariang, ka rep ka riang, bad ka jinglong ka suinbneng.
Haba iadei bad ka jingpynsngew paidbah kaba la dep, ka la ong ba ki nongkyrshan jong katei ka projek ki la ther maw ia kiba pyrshah bad ki la khang lynti da ki trok. Ka la ban jur ba ki nongshong shnong ki don ka hok ban kren ha ki jingïalang paidbah bad ban ïasam ïa ki jingshem jong ki khnang ba ka sorkar kan sngewthuh ïa ki jingeh jong ki paidbah. Ka la ong ba ia ka jingbishar kaba mynshwa ym lah ban khot ka jingbishar paidbah kaba shisha namar ba ka la kylla long kaba shyrkhei; ha ka kata ka jaka, ka la long kum ka jingpynsngew paidbah kaba la pynlong da ka bor.
Haba kylli shaphang ka jingpynkhreh na ka bynta ka jingpynsngew paidbah kaban sa wan, haba khein ia ka jingkulmar ka kong Dkhar ka la ong ba kam shym la leit sha ka jingpynsngew paidbah da ka jingshah thombor lane ban don ka jing ia mynsaw. Ka la ban jur ba ki kwah ia ka jingpynsngew paidbad kaba suk ha kaba baroh ha ka distrik ki lah ban pynpaw ia ki jingeh jong ki khlem jingtieng, bad ka la kyntu ia ka bor synshar distrik ban pynthikna ba ka rukom treikam kan dang long kaba khlem jingleh donbor.
Ka la kyntu ruh ia ka JHADC bad ia ka sorkar jylla ba kin shim khia ia kane ka kam, da kaba kdew ba bun ki briew ki la shah lehbein ha ki kam kiba iadei bad ka khyndew ka shyiap jong ki. Ym dei ban leh sting ne pynlong bunsien ha ka rukom kaba pynthut ia ka jingshngaiñ jong ki paidbah; ka jingpyngsngew paidbah biang sa shisien ka lah ban kylla long ka jingkulmar. Ki jingkhihwin ba dang shen ha JHADC da ki katto katne ki seng treimon sngewbha ki pyni ia ka jinglong jingman kaba buh jingma lada ka sorkar kam sngap ia ka sur u paidbah bad ym dei ban pynlong ia ki jingbishar tang na ka bynta ka jingmyntoi jong ki katto katne ngut.
Lada jia ka jingshah thombor ha ka por ba pynlong ia ka jingpyngsngew paidbah, ka sorkar ka dei ban shim ia ka jingkitkhlieh kaba pura. Ka la bynrap ba ki jingïakynad halor ka jaka ha kaba la thmu ban tih mawshun ki donkam ban pynbeit shwa, bad ki bor synshar kim dei ban kyrkieh ban pynlong ïa ka jingbishar.