Ka Hynniewtrep Youth Council — East Jaintia Hills District (HYC-EJHD) ka la pynlong ia ka General Meeting jong ka ha Ladrymbai Datsimpein Community Hall, ha kaba ki nongkitkam, ki nongialam bad ki dkhot jong ka seng, ryngkat bad ki nongialam jong ka HYC-Central Executive Council (CEC), ki la iasnoh lang ban ia phylliew jingmut halor ki kam bad ki bynta bapher bapher kiba iadei bad ka jingshakri ia u paidbah.
Ia kane ka General Meeting la pyniaid da u Bah Purning Shabong, CEC Member. Ka jingialang ka la sdang da ka jingduwai kaba la ialam da u Bah Aite Sana, Vice President HYC-EJHD, uba la pynkynmaw ia baroh ki dkhot shaphang ka jingdonkam jong ka jingduwai, ka jingiatylli bad ka jingtrei da ka mynsiem kaba khuid na ka bynta ka imlang sahlang.
Ha ka jingialang, la ioh ruh ia ka jingkren lyngkot na u Chief Organising Secretary, HYC-CEC, uba la pynshlur ia ki nongkitkam bad ki dkhot ba kin nang pynkhlaiñ ia ka tnat treikam jong ka seng bad ban long kiba kloi ban trei bad shim bynta ha ki kam paidbah.
U Preios Pale, President HYC-EJHD, ha ka jingkren jong u, u la ban jur ia ka jingdonkam ban pyniar ia ka seng sha ki thaiñ bapher bapher khnang ba ka jingshakri kan ym sah tang ha ki jaka ba la don lypa, hynrei kan poi sha ki paidbah ha ki shnong bad ki thaiñ kiba dang donkam ia ka jingialam, ka jingiarap bad ka jingiatreilang.
Ha kajuh ka sngi, ka seng ka la pynlong ruh ia ka jingpynkular jong ki ar tylli ki Circle thymmai, kata ka Shiphew Shnong Circle bad ka Niaw Shnong Circle. Kane ka dei kawei na ki sienjam jong ka HYC-EJHD ban pyniar shuh shuh ia ka jingdon jong ka ha ki thaiñ bapher bapher bad ban pynjan ia ka seng sha ki paidbah.
Ka jingpynkular la ialam da u Bah Roy Kupar Synrem, President HYC-CEC, uba hadien ka ka jing pynskhem u la ai ruh ia ka jingkren pynshlur sha ki nongkitkam bad ki dkhot jong ki Circle thymmai.
Ha ka jingkren jong u, u Bah Roy Kupar Synrem u la ban jur ba ka jingshim ia ka jingsmai ne jingkular kam dei tang ka jingpyndep ia ka rukom treikam lane ka bynta ha ka jingialang, hynrei ka dei ka jingkular ban trei, ban shakri bad ban ieng na ka bynta u paidbah. U la pynkynmaw ia ki nongkitkam ba ka kyrteng bad ka kyrdan hapoh ka seng kim dei ban long ka lad ban pyni bor, hynrei ki dei ban long ka jingkitkhlieh ban shakri ia ki paidbah.
La ioh ruh ia ki jingkren na ki President jong ki ar tylli ki Circle thymmai, u Aite Sana — President Niaw Shnong Circle bad Nangkiew Lamo — President Shiphaw Shnong Circle kiba la ai ka jingsngewnguh ia ka HYC-EJHD bad ka HYC-CEC halor ka jingshaniah bad ka jingai bynta ia ki ban shakri hapoh ka seng.