Ka Khasi Students Union (KSU), CEC ha ka 4 tarik u Nailur 2026 ka la shong iaka jingialang ha ophis treikam ka seng ban ia kren halor ki mat ba la pynsngew sha ka sorkar bad ruh ban pyrkhat kumno ban buddien ia kiei ba ka sorkar ka la kular ha khmat ka seng ha ka jingiakren kaba long ha ka 26 tarik u Nailar 2026 ha Secretariat.
Ha ka jingialang ka CEC ka la rai ban iai buddien iaki 5 tylli ki mat kiba ka sorkar ka la kular ha khmat ka seng ha kine ki taiew ban sa wan, bad kata ka long ban buddien khamtam iaka Falicitation Centre ha Umling bad Ratacherra bad ruh ka jingpyntreikam iaka Migrant Workmen Act kumba la iakut 20 sngi. Ka Seng lyngba ka kyrwoh Khubor na u Assistant General Secretary ka KSU u Samla Pynshailang Rani u la pyntip ba ka Seng ka pynpaw ruh ia ka jingsngew bitar halor ka jingshah thep case ki nongialam jan man ka sngi bad khamtam iaka jingshah kem u Samla Samuel Kharbani uba long u GS ka KSU Shillong Mihngi Circle ha kaba ka jingshah khot ka jong u sha sardar PS ka dei na bynta ka jingpyrshah jur ka seng halor ka jingtei mandir beaiñ hapoh ka CBI ophis kaba long ka office sorkar bad jong u paidbah hynrei ka sorkar pat ka dung nadien iaki dkhot da kaba pharep klumar bad kem bad thep case ha ka jingjia ha ka jingiaid bike rally ka seng haka 19 tarik, kane ka pyni ba ka jingtlot bad ka jingbymler ka tnat pulit ba kim lah ban kem ia kiba don kti hynrei ki shu kem klumar iaki dkhot ba ha khmat ka seng ban pynhun iano re iano khlem ki sabut ba biang ba ki leh iaka kam ba sniew. Halor ka jingshah khot hajir bad jingpyndik ka sorkar ia ki dkhot ka seng ka seng ka buh ruh iaka jingkylli mynta ba haba ki pulit ki khot kumne bad pyndik kumne hato ka police department ka lah kem ne em tang uwei u briew uba pynjulor kali uba tih iaka surok paidbah bad uba don kti ha kane ka thombor iaki paidbah ba leit pyrshah iaka public hearing ha ka janmiet jong ka 30 bad step jong ka 31 tarik u Naitung ba long ka public hearing ka Shree cement ha lum syrman Elaka Nongkhlieh, haba ka ain ka dei ia baroh bad ym don mano mano halor ka ain balei ka noh shiliang tang iaki dkhot ka seng ba tang ka sakhi sabut kim don hynrei ki kem naphang, kane ka pyni ba ka ain hi ka nohshiliang haduh katta katta ba wat hadein ar bnai ruh ka seng kam pat iohi uwei ruh u ban shah kem ba leh ia kane ka kam thombor ha ka public hearing. Halor kane ka seng kan nym shong kli kti bad ka ai ia ka sorkar 3 sngi ban kem noh ia kine ki briew ba don kti bad wat ia ki briew sorkar ruh kiba lah ban don kti lym kumta ka seng kan hap ban pyrkhat da kiwei pat ki lad ki lynti hadien kane ka por ba la buh. Ka seng da ka rai rangbah ba la shim mynta ka sngi ka la rai ban lada ym urlong kine ki jingdawa bad ba lada ka sorkar kam pyni dak pyni shin iaki mat jingdawa kin treikam noh mar mar ka seng kam banse ban weng iaka temporary suspension ban iakhih kumba la pynbna ha ka 26 tarik u bnai ba la dep bad kan bteng biang iaki jingiakhih nangne sha khmat.
Ka KSU kan buddien bad peitngor ïa ki sienjam jong ka Sorkar halor kine ki mat ha kine ki sngi bad ka seng ka pynpaw biang ba ka jingïai sngap jong ka Union kam dei ka dak jong ka jingpdiang ïa ka jingpynslem. Ka Union ka la ai por ïa ka Sorkar ban pyni ïa ka jingtreikam bad ka jingpynbeit. Lada ka Sorkar kam ai ïa ki jubab kiba biang, kam pyni ïa ki sienjam kiba shai, ne ka bteng ban pynslem ïa ka jingpyntreikam ïa kine ki mat, ka KSU kan pynsdang biang ïa ki jingïakhih paidbah ha ka rukom kaba dei bad kaba paidbah.Ka seng ka pynshai ba ka jingïakren ka don jingmut tang lada ka wanrah ïa ka jingtreikam. Ka jingïai ap jong ki paidbah bad ki samla jong ka jylla kam dei ban shim kum ka jingpdiang ïa ka jingbymtreikam jong ka Sorkar.Ka Sorkar mynta ka dei ban jied ia ka jingpyntreikam ïa ki mat jingdawa jong ki paidbah ne ka jingsdang biang ïa ka jingïakhih paidbah jong ka KSU.