Halor 5 tylli ki mat jingdawa ba ka Seng KSU ka ka buh sha ka Sorkar ha kine ki khyndiat sngi ba lah dep, ka Seng mynta ka sngi ka 8 tarik Nailur 2026 ka la shong jingialang biang bad ka Sorkar jylla ban buddien ia ki 5 tylli ki mat kiba ka Seng ka lah dep ban pynsngew sha ka Sorkar jylla.
Haba kren sha ki lad pathai khubor u Assistant General Secretary ka KSU u Samla Pynshailangborlang Rani u la ong, ba ka Sorkar ka la iaid shakhmat haba iadei bad Fact Finding Committee bad ka Sorkar ka la kular ruh hakhmat ka Seng ba u Deputy Commissioner, SP ka East Jaintia Hills District bad kumjuh ki ophisar ka Meghalaya State Pollution Control Board kin ym don bynta ei ei ha kane ka Fact Finding Committee khnang ba kan long kaba iaid beit iaid ryntih.
Halor ka MRSSA u Samla Pynshailangborlang Rani u la pyntip ka Sorkar ka la shimkhia bad lashai ka sngi kan don ka jingialang ha Umling bad ka la khot ruh ia ki nongialam ka Seng ban leit jurip ha katei ka jaka ha Umling bad hadien kane kan sa don ruh ka jingbuddien ka Seng haba iadei bad ka khyrdop rung khyrdop mih ha Ratacheraa East Jaintia Hills.
U la pyntip haba iadei bad ka Work Men Act 2020, ka Sorkar ka la batai shai ba lashai ka sngi kan don ka jingaijinghikai ia ki ophisar ban peit ia kane ka tnad, khnang ba ka jingpyntreikam ia kane ka aiñ kan long kaba iaid beit iaid ryntih la ong u Samla Pynshailangborlang Rani.
Nalor kata u la pynsngew haba iadei bad ka thungkam thungjam ha ka Jylla ha ka Group D, ka Sorkar kan sa phah da ka jingpyntip sha ka Seng ba ka Personal Interview kan nym don shuh ia ki Samla thep kam ha ka Group D , haba iadei bad ka Group A bad B, u la pyntip ba ka Sorkar ka dang pynbeit ia kane bad kan sa phah da ka jingpyntip ha ka Seng.
Halor ka NEIGRHIMS u Samla Pynshailangborlang Rani u la kyntu ia ka Sorkar ba kam dei ban shu khynñiat tang sha ka Seng ban kynduh ia u Myntri ka Sorkar pdeng , hynrei ka dei ka kamram ka Sorkar ban pynsngew sha ka Sorkar pdeng ban pynurlong ia ka mat jingdawa ka Seng haba iadei bad ka thungkam thungjam ha NEIGRHIMS.
