Ka East Jaintia Hills District Football Association (EJHDFA) mynta ka sngi ka la plie paidbah ïa ka Thomas Nongtdu Memorial Trophy 1st Division 2026, kaba la pynlong ha Artificial Ground jong ka East Jaintia District Sports Association ha Diengshynrum.
Ha ka jingïalang la wan ban sakhi da ka MLA jong ka Sutnga-Saipung Constituency, ka kong Santa Mary Shylla kum ka kongsan, ki MDC ka JHADC, ka kong Violet Lyngdoh, ma Krison Langstang, ki nongkitkam ka EJHDFA, ki riew rangbah bad ki paidbah kiba la wan ban sakhi ïa ka jingïalehkai.
Ka jingïalehkai kaba nyngkong ha kane ka sngi ka long hapdeng ka Musniang SC bad ka Khliehriat East YWSC, ha kaba ka Khliehriat East YWSC kala jop da shikol 1-0 ïaka Musniang SC bad ïa katei ka kol la thep da u Kyntulang Nongwar haka minit ba 75.
Haba kren ha ka jingïalang, ka MLA jong ka Sutnga-Saipung Constituency ka la ong ba watla u kpa jong ka um don shuh, hynrei ka jingkynmaw ïa u ka dang iaineh. Ka la ai khublei ïa ka synjuk kaba la buh kyrteng ïa ka First Division da ka kyrteng jong u kum ka Thomas Nongtdu Memorial Trophy 1st Division 2026, da kaba pynkynmaw ïa ki kam babha kiba u la leh ha ka por ba u dang im.
Ka Santa ka la ong ba ka kynmaw bha ba ha u snem 2012, u kpa jong ka u long uwei na ki briew kiba la shim bynta ha ki jingpyrshang ban seng ïa ka district thymmai, kaba mynta la tip kum ka East Jaintia Hills District. U MLA barim, Nehlang Lyngdoh, ruh u long uwei na kiba la trei shitom ban pynlong district ïa ka thaiñ. Ka la ong ba u Mukul Sangma, Myntri Rangbah barim ka Meghalaya, u la plie paidbah ïa ka East Jaintia Hills District.
Ka la ong ruh ba ha ki snem kiba la leit, ka East Jaintia Hills District ka dang duna bha ha ka liang ka roi ka par. Hynrei mynta ka district ka la kiew shaphrang bha, da ka jingdon jong bun ki ophis sorkar bad kiwei kiwei ki jingdonkam paidbah.
Ka la ong ba ka EJHDFA ka la treikam mynta la 42 snem. Watla mynshwa ka synjuk kam pat paw bha ha ka paidbah, hynrei ha kine ki snem ba dang shen ka la nang paw bad ioh ka jingithuh paidbah. Ka la kitbok ïa ka synjuk, baroh ki kynhun kiba shim bynta bad ïa ka tournament ba kin poi sha ka jingjop.
Ha kajuh ka por, u James Sutnga, General Secretary ka EJHDFA, u la ai khublei ïa ka ïing ka sem jong u Thomas Nongtdu halor ka jingïatreilang jong ki ha kine ki sngi ba la dep. U la pynpaw ruh ïa ka jingsngewnguh ïa ka ïing ka sem namar ba ki la pdiang ïa ka jingtyrwa jong ka synjuk ban buh kyrteng ïa ka First Division da ka kyrteng u Thomas Nongtdu, ban pynneh ïa ka kyrteng, ka burom bad ka jingkynmaw ïa u.
