[Da u ma K. Kyndait, Jowai]
Ka Ri Khasi bad Jaiñtia ki ar jaitybynriew ki la ioh ia la ka jong ka District Council ha u snem 1952 bad la tip kum ka Khasi and Jaintia Hills Autonomous District Council bad ka ophis trei kam jong ka ka long ha Shillong bad ha Jowai pat la pynkha tnat trei kam hapoh ka jingpeit U Revenue Officer kum u sahep ba khlieh duh jong ka. Te ka jingiaid jong ka por ka Jaintia Hills ka la sngew dei ban ioh noh la ka jong ka District Council bad ka la ioh hi ruh ha u snem 1964 bad ka ophis trei kam ka long ha Jowai.
Ka jingthmu ba la pyllong ia ka, ka long ban iada ia ki trai ri na ka jingwan ki bar jylla ba bun pait halor ki kam (subjects ) 1. Ki Iew. 2. Ki khlaw ki btap (lait noh ki jong ka state government ), 3. Ki khyndew ki shyiap. 4. Ki um ki wah 5. Ki riti ki dustur. 6. Ka kam thung Waheh Chnong bad Dolloi bad kiwei kiwei de ki kam (subjects) kumba 10 (shiphew) tylli.
Ban iada bad pyntrei kam ia kitei haneng donkam ban jied ia ki Nongmihkhmat na ki constituency ba pher ba pher shisien ha ka san snem. Ha ki por ba mynshuwa ki M.D C. jong kane ka Jaintia Hills Autonomous District Council, Jowai ka trei shibun ki kam ha kaba iarap ia ki briew bad iada ruh ia ka bhah ba la ai bad pynlong aiñ ruh ia ki bad khamtam ki nongtrei bad ki pensioner kim ju mat ia ka jingduh tulop. Hynrei sngewsih ban ong ba katba nang iaid ki por ki nongmihkhmat imat ki la hiar ka akor ka burom bad pher bak la bak bad ka jingtrei kam jong ki kam ia dei kumba la khmih lynti da ki nongthep vote.
Ha ki por ba mynshuwa ki nongtrei kim duh tulop man la u bnai kaba long u bud lum jong ki. Ym ju don bar jylla ba la ioh lad ban wan kamai lait noh tang kawei ka petrol pump ha Lad Nartiang ha ka kyrteng u trai ri trai muluk. Hynrei mynta kane ka District Council, Jowai da ka bor ki nongmihkhmat ba don burom (ym baroh) ki la ai N.O.C sha ki bar jylla, tip da ei la pynshoh jadu ia ki. Ha ka jingshisha ka la dei ban ym ai khnang ba kan long ka lad jingkyrshan ia ki trai shnong. Kaba sngewsih ka long ba kawei ka dukan die jaiñ ha ka lad ban leit sha Wahnangbah ka la nang ring sti tang namar ba la ioh trading licence die jaiñ kiba bun bun ki bar jylla. Kumjuh ruh kawei na ki dukan hardware mar pyrshah ka Police Station ka la shah rem namar kane ka District Council ka ieit eh ia ki Bar jylla bun spah bad la mih bun bun ki hardware sha ka thaiñ Ladthalaboh, Mihmyntdu bad Loom Sooyung Newhill, Jowai ruh bad haba kumne sa kiei pat kiba kin iarap ia ki bar jylla ha ki por ki ban wan. Ha ka jingkren election te ban iada ia ki para jait para kynja, para jaitbynriew hynrei ha ka kam pat la khring bad kyntiew ia ki heh spah. Phai sha ki thaiñ Elaka Narpuh kumno ki C.E.M. ba mynshuwa bad sngewmat uba mynta ruh ki shlan ban ai N.O.C khlem da pyrkhat ia ka lawei ki para doh para snam bad ia kane ki la iohsngew da la ki shkor bad iohi da la ki jong ki khmat imat kim patiaw namar la biang la kdang.
Ban pyndam ia ka District Council te ym kwah bad kam long kaba shongnia namar kam shym leh ma ka hynrei ki nongmihkhmat ba shukor ia kiba la kyrshan bad jied da ngi hi ki nongthep vote ioh dei halor ka nongrim da ka pisa, kyiad bad kiwei kiwei ki lad. Ba tieng ba ioh ha ki por ki ban wan kin pynbieit sa da kawei pat ka jait jingdih tang ban jop bad kiba pdiang ki mat iap shato. Hato kam dei ka por ba yn pyrkhat noh ha kane ka election M.D.C. 2025 ban ioh da ki nongmih khmat ki ban trei hok kat kum ka nongrim ba la seng ia ka District Council.
Kumjuh ruh jied ia U/Ka kiba wan na ka ïing ba don burom ka nam ba bha, ki bym ju shukor ne thok, kiba ieit bad isynei ia ki para marjan ia ki ba duk bad ba shitom. Kiba don ka jingnang jingstad kaba biang ba pura.