Hadien ba la mih ka jingiakhajia jaka jong ki ar tylli ki shnong kata ka shnong Lama bad ka shnong Lakadong Ummat halor ka jingthmu ka sorkar ban pyniaid ia u surok bah Green Field High Speed Corridor kala wan rah shaduh ka jingmynsaw jong ki nongshong shnong jong ka Lama.
U District Magistrate (DM) jong ka East Jaintia Hills District u Manish Kumar, IAS, u la iathuh ba la ioh jingtip ba ka la don ka jingpyndonkam jong ki ar shnong mamla da ki tiar pynmynsaw kum ki suloi, ki lathi, ki wait, ki tiar pynbthei bad kiwei de ki tiar pynmynsaw, kaba la wanrah ia ka jingma bad jingmynsaw jong ki paidbah kumta u la hap ban pynjari noh da ka kyndon 163 BNSS (Bharatiya Nagarik Suraksha Sanhita) ban khang lad ia ki nonglehkam sniew bad ban iada ia ki riew paidbah.
Katkum kane ka kyndon la khang pyrshah ia ka jingialum briew palat ia ka 5 (san) ngut hapoh kitei ki jaka ba don ka jingiakynad hapdeng ka shnong Lama bad ka Ummat. La khang ruh ia ka jingrah ia kino kino ki jait tiar pynmynsaw.
Yn ym shah ia kino kino ki kynhun bad khang ne pynwit pynthut ia ka jingiaid jingieng jong ki briew, ki kali motor ne kiba pynpoi ia ki mar ba donkam.
La khang pyrshah ia uno uno u briew ne ki kynhun ban thaw ia kino kino ki jait jingpynkulmar kaba ktah ia ka shongsuk shongshngaiñ jong ki riew paidbah.
Lada lap ia kiba ialeh pyrshah yn pynshitom ia ki katkum ki kyndon jong ka aiñ BNS, 2023 bad lah ruh pynhap ha kiwei pat ki kyndon katkum ba shong ka aiñ.
U DM ula pyntip ba kane ka hukum kan treikam noh mardor naduh ba la pynmih ia ka mynta ka sngi (3/3/2026) tad haduh ban da pynmih da kumwei pat.
