Ka National Book Trust, India (hapoh ka tnad pule puthi jong ka sorkar India) ka dap da ka jingkmen ban pynlong biang ïa ka Shillong Book Fair kaba ar ka ban sdang naduh mynta ka sngi ka 5 haduh ka 13 tarik Risaw 2024 ha State Central Library, Shillong. Ia kane ka Tamasa Kot yn plie paidbah da u Lat ba donburom jong ka jylla Meghalaya, u Shri C. H. Vijayashankar. Ha ba kren sha ki ladpatahi khubor, na ka liang u Bah Frederick Roy Kharkongor uba long u Principal Secretary jong ka tnad Arts & Culture ka Sorkar Jylla Meghalaya, u la ïaroh ïa ka jingtrei shitom jong ka NBT-India ban pynlong ïa kane ka tamasa kot, khamtam ban kyntiew ïa ka kolshor ban pule kot ha kane ka juk mynta ba la synshar da ki screen. U la iaroh ia ka jingpynrung ia ki jingai jingmut ba khlem jingsiew ha ka fair na ka bynta ki samla, namar kane kan pynshlur ia ki samla ban angnud ban ioh ia ki kam sorkar bad kiwei kiwei ki kam jong ka ri.U Yuvraj Malik, Director, NBT-India u la ban jur ba hadien ka jingjop kaba khraw ha ki snem ba la dep, ka Shillong Book Fair mynta ka la kylla long ka jingïalang kaba man la u snem. Kane ka fair jong une u snem ka sngew sarong ia ka jingbun ki stall bad ki kam ba kyrpang kiba pynshong nongrim ha ka jingtbit na ka bynta ki samla pule bad ki samla rangbah. U la pynpaw ia ka thong jong ki fair ban pynithuh ia ki samla sha ka pyrthei jong ki kot bad ka jingiathuhkhana, ban pynjngai ia ki na ka jingpyndonkam palat ia ki kor pynbyrnia . U la pynleit jingmut ruh halor ka stall jong ka Rashtriya e-Pustakalaya, ka jingthmu jong ka digital library ha kaba ki nongwan fair ki lah ban download ïa ka aplikeshon bad ban ïoh ïa palat 1,000 tylli ki kot khlem jingsiew bad ki lad jinghikai ha ki ktien India bapher bapher. Kane ka jingrakhe ia ki kot bad ka kolshor kaba shi taiew kan don kumba 100 tylli ki stall, ki ban pyni ia ki kot bapher bapher ha ki ktien bad ki jait kot bapher bapher jong ka ri India. Ki riew ieid kot ki lah ban wad bad thied ïa ki kot na kiba bun ki nongpynmih kot ha kane ka jingïalang kot kum ka Penguin Random House, Simon & Schuster, Pan Macmillan, National Book Trust India, Woodpecker, Cambridge Book Depot, bad kiwei kiwei. Kane ka jingïalang kan long ruh kum ka rynsan na ka bynta ki kam thoh kot bad ka kolshor ha baroh kawei ka taiew. Ka jingpyni kot kan sdang da ki jinglehkai ba sngewtynnad ha Childrens Corner ryngkat bad ki khynnah skul kynthup ïa ki jinghikai thoh kot, jingïathuhkhana da ki jingrwai, ki jinghikai shna puppet, ki jinghikai ban ïada ïalade, ka jingdro dur, ka jingkheiñ Vedic bad kiwei kiwei. Ki khynnah kin iashim bynta ruh ha ka jingdro dur, shna poster, bad shna dur, ban pynthikna ia ka jingshem kaba pynriewspah ia ki nongpule samla. Ki nongpyniaid ba tbit kum ka Meghalaya Taekwondo Association, u Vasudha Ahuja, u Kunal Shandilya, u Vivek Kumar bad ka Seema Wahi kin ialam ia kine ki kam . Ki por mynstep kin long kiba sngewtynnad ha ka Literary Corner ka ban don ki jingiakren bad ki jingpynlait paidbah ia ki kot, kaba ai lad ia ki nongthoh bad ki riew pawkhmat ha ka thoh ka tar ban iasam jingmut bad ki nongsngap. Hadien kane yn bud sa ka open mic session na ka bynta ki samla ha kaba ki samla pule kolej ki lah ban pyni ia la ka sap ha ka poitri, ka jingrwai, bad ka jinglehkai, kaba thaw ia ka jaka kaba sngewtynnad bad kaba thymmai na ka bynta ki samla.Ki janmiet kin im da ki Jingshad Cultural Performances kiba pyni ia ki jingshad kiba pynkhih mynsiem da ki nongrwai ba pawnam na ka jylla Meghalaya. Ki nongpeitkai kin ïoh mad ïa ki jingshad tynrai ba la shna da ka Geetanjali Dance Academy; ka jingrwai ba im da ki kynhun kum ka kynhun tem Pynter, ka kynhun tem Colors, ka kynhun tem Kupar Shadap, ka kynhun tem Alive bad ki jingpynpaw ia ka kolshor kum ki jingrwai flute bad ki kynhun tem tyngshop. Kine ki jingpyni kin rakhe ia ka kolshor ba riewspah jong ka Meghalaya, da kaba wanrah lang ia ki jait jingdro bapher bapher na kane ka thain. Kane ka Book Festival ka plie naduh ka por 11 baje mynstep haduh 7 baje janmiet man ka sngi naduh ka 5 haduh ka 13 tarik Lber 2024 ha State Central Library. Yn ym shim bairung na ka bynta baroh ki nongwan jngohkai bad kan don ka jingpynhiar dor 10% ia ki kot.