Ka sorkar jylla jylla mynta ka sngi ka 9 tarik Jylliew ka la pynshai paidbah ia ka jingjia halor ka jingshah pyniap u nongwan jngohkai na Indore u Raja Raghuvanshi ha Sohra.
Na ka liang u Bah Prestone Tynsong u Dy. Chief Minister bad uba dei peit ia ka tnad kam Pohïing (Home) ha ka jingiadon lang bad ki Pulit ba kynthup ia u SP ka East Khasi Hills bad kiwei ki ophisar Pulit haba kren sha ki lad pathai khubor mynta ka sngi u la ong ba ki Pulit ki la ioh kem ia 4 ngut kiba donkti ban pyniap ia u Raja Raghuvanshi u lok jong ka Sonam Raghuvanshi hadien ba ka Sonam ka la pyndem hi ha ki Pulit jong ka Uttar Pradesh.
U ong ka long kaei kaei kaba sngewsih hadien ba ka jylla ka la shah kynthoh ha ki briew kiba nabar shaphang ka jinglong ki briew ha Sohra kaba pyntieng pynsmiej ia ki nongwan jngohkai na India bad kumjuh ia ki nongwan jngohkai nabar India kiba sah umdum bad mynta ki jingshisha ki la paw lut halor ka jingjia ia u Raja Raghuvanshi.
U bah Prestone u la iathuh ba ia ki 4 ngut kiba donkti ryngka bad ka Sonam Raghuvanshi kiba pyniap ia u Raja Raghuvanshi kin ngat ha ka aiñ bad ki pulit kin wan ialam sha Meghalaya ban tohkit bniah.
U Bah Prestone u la ai khublei ia ki paidbah ka jylla naduh ki Pulit, ki NDRF, SDRF, SOT, SIT, NESAC, ki nongkiewlum na West Jaiñtia bad kumjuh ki Paidbah ka thaiñ Sohra ki Dorbar Shnong bad kiwei kiwei kiba ia wan ban wad ia ki shijur bad haba khatduh ki Pulit ki la lap noh ia ka jingshisha baroh halor ka jingshah pyniap jong u Raja.
Na ka liang ka sorkar ka kyrpad ia ki paidbah ka jylla ban nang ai mynsiem shuh shuh ia ki Pulit ka jylla kiba la ai mynsiemia ki Pulit ha kine ki kyndiat sngi ha ryngkat ka jingiatreilang lang ki paidbah, ki nongshong shnong, ka thain sohra, ka District Administration, ka Civil Sub Division Sohra bad mynta la ioh ban kheit ia u soh bad da kane ka jinglap ia ka jingshisha baroh bad kaba la weng lut ia baroh ki jingartatien kiba don ha ki nongwan jngohkai sha ka jylla Meghalaya.