[Da u S.Lamin, Jowai]Ka wah Myntdu ka dei kawei na ki wah kaba la rim bha, ka la shakri ia ka shnong Jowai da ki spah spah snem haduh mynta, ka ai umbam umdih ka ai ka lyer kaba iwbih kaba pyngngad hir hir. Ka don ruh ka dor ba rem haduh katta katta kaba ym lah shuh ban siew da ka dor ka long ruh ka wah ka ba khang lad khang lynti ia ki jingpang jingshitom kiba bun jait bun sker ka dei ruh ka wah kaba ker talawiar baroh sawdong ia ka shnong Jowai.
Kat kane ka jinglah jong ka ban pyndap pynbiang pynban kane ka wah ka don mynta hapdeng ka tmier, namar ka jingshah leh beiñ ka jong ka ha ki nong shong shnong kiba shong sawdong jong ka. Kane ka wah ka ud ka iam marwei namar la teh la khum ia ki kti ki kjat jong ka da ki jaboh jabaiñ, ka ba kham sngewsih ka long ïoh ba kam lah shuh ban shakri ia ki briew hadien ha bud. Haba iaid sharum shaneng naduh trai bad ha baroh shilynter ka jong ka ki jingjyrsieh kiba mih haka ki bym lah shuh ban batai.
Ka jingma kaba kham khraw kaba ap ia ka wah Myntdu mynta ka dei namar ba ki nong Jowai kim don jaka bret ñiut shuh la shu bret pathar kat sha ba lap ba shem, ki briew kiba shong sawdong jong ka shnong Jowai ki ud ki nam ha la ki ïing ki sem ki jing pynsngewthuh paitbah ki mih ki jinghikai bapher bapher kumno ban iada ia ka wah Myntdu kaba long ka nongpyndap umbam um dih bad ïaki jaka rep jong ki briew, kane ka long kaba bha eh.
Shuh shuh lada phai sawdong jong ka i kumba sa katto katne tylli ki snem ka wah Myntdu kan sa duh kan sa dam noh namar ka jingleh u khun bynriew. Ki ba sait jaiñ sait nep kiba sait kali ki ba tih shyiap bad kiba khlong maw kine ki long kita ki ban pynjot ia ka wah Myntdu. Naduh Mihmyntdu haduh ban da kut ka Syntu Ksiar kane ka wah kam long shuh kumba ka ju long.
Ha shilynter jong ka wah Myntdu don ki liar ki kyor kine ki liar ki kyor ki wan tuid hapoh jong ka, kine barabor ki long kum ki nongiarap ban pynsngaid pynplung iaka, pynban haba phai pat ha kine ki sngi mynta kine ki long pynban ki nongshun ba khlaiñ bor ban pynjot iaka. Ki briew ki ba shong sawdong sawkun jong ka Wah Myntdu mynta kim don lad shuh ban bret ñiut kumba ki ju bret mynshwa ba la wan kit ha ki ïing ki sem. Ki la hap ban bret ha kine ki liar ki kyor kine pat ki jhep lane ki ñiut kiba mih ha ki iing briew ki la tuid sha ka wah Myntdu lada kane ka rukom kan neh kumne aiu kan jia hadien ha bud ia kane ka wah.
Kane ka long tang ka jingpynkynmaw ia ngi baroh lang kiba don sawdong jong ka wah Myntdu, ba katne ka la leh bha ia ngi hato ngi hun mo ban shu pynjot ban pynduh pyndam noh iaka tang da ki jingleh jong ngi. Hato kum ki nong shong shnong ngim don mo ka jingkit kit khlieh ban iada iaka da ngi hi, hato ngi hun mo kum ki khun ki ksiew ban shu peit ban shu shong kli kti khlem da kner la ka kti ka diang ka kti ka mon katba ka por kam pat dier to ïada ïa ka wah Myntdu. Chi hajar ngooh.