[Da u Kerlang Ksoo, Dkhiah West, East Jaintia Hills]
Kum u briew ba im ha ka imlang sahlang u Hynniewtrep bala wan lang bad ka jinghikai jong ka mynnor ha ka ban im hok bad shakri hok ia ka iing ka sem, ka kur ka jait, ka shnong ka thaw bad ka ri hi baroh kawei, ngam lah ban shu peit bad sngap ia ka jing-ud ka jingshitom bad ka jingkordit jong u rit u ria, u kup shilliang u sem shilliang u kyndong u kynshrot ha ka iadei kam iadei jam bad ka Distrik Konsil ba donburom jong ka Ri Jaintia jong ngi. Khlem lah ban da len ba ka Jowai ka dei ka jaka pdeng ia ka ri Jaintia hi baroh kawei bad ka da long hok hi ruh ban buh ia ka ophis treikam jong ka konsil ha Jowai na ka bynta ban ai ia ka jingshakri ia u luk u lak hapoh Jaintia.
Hynrei, bunsien bunsien hi u kyndong u kynshrot ba sah bad shong na jngai na Jowai u shait kynduh mawsiang man ka por ban iadei kam bad ka konsil namar ka jngai ia u ban poi lynti ban poi syngkieng. Nalor ka jingbym biang ki surok bad ki lynti syngkieng na ki shnong kyndong ban leit mih sha Jowai, sa ka dheng kali ha ki surok bah ba man ka sngi kaba bunsien bunsien la shu kylla long leh noh-ei ban pyndep kam tad haduh ban da poi jaka. Nalor ka jingshitom ha ka bai lynti syngkieng, sa ka kordit ba bunsien bunsien ym ju lap ne lah ban pyndep kam tang ha ka shi-sngi.
Iaid ki por ki snem, ia ka Jaintia la phiah noh ha ki ar liang – ka East bad ka West. Ki Nongshong shnong jong ka East Jaintia nalor bala jngai na Jowai bunsien ki mad ia ka jingdukha mynsien khamtam mynta ki por ba ka surok bah naduh Malidor/ Ratacherra sha Jowai ka dap tang ka sahkut kali ka dheng kali kaba man ka sngi. Leh noh-ei ki jingthmu ha ka ban pyndep kam, bunsien bunsein shiteng lynti la hap ban phai biang sha la shnong la thaw bym ju poi jaka ha ka por ba biang.
Ha ka jingshisha ia kane ka jing-eh jong u luk u lak nga lah dep ban thoh bad ban kyrpad ia ka konsil khnang ba kan plie ia ka tnad ophis treikam jong ka ha East Jaintia Hills kum ban pynsuk bad ai jingiarap shibun shah ia u rit u ria ha kaba iadei bad ki kam ka konsil. Nga lah thoh bad kyrpad ia ka konsil naduh ka 22nd May, 2025. Phewse, haduh mynta ruh, ka konsil ka shu leh bym bna bad khapbrip ia ka jingkyrpad ban buh ia ka tnad treikam ka konsil ha East Jaintia Hills. Kaei ka jing-eh ia ka konsil ba kam lah ban leh na ka bynta ka jingsuk u paitbah?? Ne ka don ka daw sha lyndet ba ka konsil kam treh ban buh la ka tnad treikam sha East Jaintia Hills.
Ka iing maw ba itynnad kaba heh bad kaba Ar mala bala pynieng da ka konsil ha Khliehriat East, East Jaintia Hills mynta kala kylla long pat tang kum ka iing ba shah ieh khunswet bym don ba peit ba khmih. Hato ym dei ba ia kane ka iing la tei na ka bynta u Paitbah?? Khatduh iawai, kumba ka samoi iathir jong ka konsil kan long ha ka 20th November, 2025. Na ka bynta jong u nongshong shnong jong ka East Jaintia Hills hi baroh kawei nga kyrpad ba ka konsil kan pyrkhat lem ia u paidbah ban plie noh ia ka tnad treikam jong ka konsil ha East Jaintia Hills kum ka lad ban pynsuk ia baroh kiba iadei kam bad ka konsil.
