Ka dei ka jong ngi ka Jaitbynriew Hynñiewtrep bad ka Pyrthei
[Da u ma Khroo L Pariat, Jowai]
[Khroo L Pariat, Jowai]
Ka Behdieñkhlam ka pynlaitluid ïa ka Mynsiem ka jong ngi ki Briew na ki jingshah teh shah khum Mraw ha shibun bah ki jingpynithuh ïalade, ki dawbah ba pynïakhlad ïa ngi tang da kata ka jingsngew. Kumta Shad hajrong ka maw, hajrong ka dieng, shad ha ka Ktieh, Shad ha kano kano ka jaka kaba jakhlia tam. Naba ïa ka Mynsiem la pyndap da ka jingkmen bad jingkyrkhu BLEI. Namar kata ngi sakhi ba ym don ka Pang ka Shitom, ka ïa Mynsaw ka mynsnam ha kane ka Behdieñkhlam. Tang ka jingkyrkhu khyrdoh Kylliang para bynriew naduh na ïing haduh ha ka Shnong bad ka NGUH BLEI ban Koit ban Khlaiñ lang baroh ki Briew.
Kumta ngi kum ki Pateng Khun, Pateng Ksiew kiba wan na kajuh ka Tynrai, ba la seng na ka Ïawbei u Thawlang, ka Jaitbynriew Hynniewtrep ngi dei ban ïa shimbynta bad ïa wer sa ïa ki paralok ki jong ngi najan na jngai ban wan ïashimbyntalang ban sakhi met bad mynsiem bad ngin pynïeng ïa la ka nia ka jutang lyngba kane ka Behdieñkhlam ban Koit ban Khlaiñ ban Laitluid ka Jaitbynriew ka Ri ka jong ngi sa shisien sa shisien na kane ka khlam kaba teh ïa ka jingmut jingpyrkhat ban isih ïa la ka jong bad Burom ïa jong kiwei. Kaba wanrah ïa ka Khlam ka bamsap ka bam tyngka.
U BLEI Ka BLEI, Ki BLEI kin Kyrkhu Khyrdoh ïa ngi ban biang ka UM, ka Bam, ka Koit ka Khiah, ka Kamai ka kajih, ka Longbriew ka Manbriew bad ka Ri hi baroh kawei.