(BY LAWANRISHISHA SYIEMLIEH)
Katei ka Helipad ka don ha ka shnong Mawthengkut, West Khasi Hills District, Meghalaya.
Ka dei kata ka private plane kaba nyngkong eh ba la wanrah hapoh ka jylla bad hapoh ka India hi baroh kawei. Kane ka Helipad ka dei ka jong U Sahep Alan Mackloed uba na Scotland uba dei ruh u lok jong ka Maysalin War kaba dei ka MLA Kynthei Khasi kaba nyngkong eh napoh ka jylla jong ngi. Kine arngut shilok ki wan shong wan sah ha ka shnong Mawthengkut bad ki don ruh ka ing Bangla phareng jong ki kaba itynnad bha kaba dang sah haduh mynta mynne hakaba ki khun pyrsa jong I kong Maysalin ki peit ki sumar iaka ha ka jingbym don shuh jong ki.Kine ki khun pyrsa kila sumar iaki jingdon jingem baroh.
Hadien ka thma bah ba ar lane ka World war II (1939-1945) u sahep Alan Mackloed uba dei u engineer ula iakynduh ia I Kong Maysalin War iba dei ruh I nurse hakito ki snem. Kine arngut kila iathoh shongkurim badonburom ha Methodism Church, Calcutta. U sahep Mackloed ula wan bud noh ia I Maysalin War sha Shillong bad ula dei u member jong ka Lime company bad ula long ruh kum u manager jong ka Assam Silimanite Private company kaba don ha Sonapahar lane Mawshynrut ba ki khot mynta.
Hadien katto katne snem jong ka jingtrei jong u hapoh Sonapahar, u sahep ula sngew donkam ban wanrah noh daka helicopter khnang ban suk ka leit ka wan, kumta ula leit training ha Gauhati Flying Club haduh shi snem shiteng bad ka training ka ju long shisien shitaiew. U sahep ula shna ruhiaka Helipark lane ka jaka sangeh Helipad ha Wahblei, bad kane ka madan aeroplane ba ju khot ki traishnong ka dang sah haduh mynta. La shim por ban pyndep iakane ka Helipark kumba haduh ar bnai eiei.
Haka 8 tarik November 1964, la wanrah iaka Helipad sha Sonapaharda uwei u Punjabi pilot, hynrei namar ba kane ka Helipad ka don Artylli ki thapniang, U Sahep um shym la imon iaka bad ula phah telegraph sha Gauhati ban pynphai noh iaka. Ha kajuh ka sngi haka por 3 baje janmiet, la leit pynphai pat iaka bad haka sngi kaba bud pat la wanrah sa da kawei ka Helipad kaba don Artylli ki seats. Iakane kawei pat la wanrah da u pilot Manhas hynrei kane ka helipad ka la fail noh ha ka rukom landing jong ka hakaba kawei na ki tyre kala hap ha pynthor kba. Namar ba kane ka helipad ka la sniew noh kiba dei incharge na Gauhati kim treh shuh ban shim biang iaka wat la u sahep ula phah telegram biang.
Haka 10th November 1964, la wanrah sa iakawei pat ka Helipad hakaba tang u sahep ulah ban shong bad niah.ka kyrteng jong kane ka Helipad kadei ka “Vat”. U sahep uba la dei ruh u Major Alan Mackloed ha kito ki por ula niah bad pyndonkam iaka.
Hynrei kaba sngewsih ka long ba haka 10th March 1967, u sahep ula khlad noh naka jingshitom jong u.
Namar ba ym don mano mano ruh kiba nang ban niah iakane ka Helipad, kumta la wanrah noh iaka na Helipark, Wahblei sha phyllaw ing jong I kong Maysalin bad u sahep ha Mawthengkut.
Mynta kane ka Helipad wat la ka dang don hi satang ki shynrong jong ka, hynrei da peit iaki shynrong jong ka ki dang iskhem hi.
Ka jingdon jong kane ka Helipad, ka Bangla, ki guesthouse, kumjuh ruh ka War’s lake (War ka dei ba la ai iaka jait jong I Kong Maysalin War) jong u Sahep Mackloed bad I Kong Maysalin War ka dei kawei na ki jingdon ba itynnad kaba khring bha iaki nongwan jngoh kai sha ki thain Mawshynrut lane Sonapahar. Ki don katto katne ki phareng ruh kiba tip iakane ka histori jong u Sahep Mackloed bad I Kong Maysalin ki ju wanpoi ban jngoh kai iaka Helipad bad iaka Bangla jong kiha Mawthengkut.
Haduh mynta ki dang don ki jingsah Jingkynmaw na I Kong Mysalin War bad U Sahep Alan Mackloed. I Kong Maysalin War ila khlad noh ha u January 2013 ha ka rta kaba 88 snem ha Gordon Robert Hospital, Jaiaw, Shillong.
Kum iwei naki trai shnong jong ka shnong Mawthengkut ba la kha la heh la san hangne, ngim lap iohi shuh ia I sahep hynrei ia I Nahnah ngi kynmaw bha. Ngi ju khot ieid ia I Kong Maysalin kum I Nahnah Maysalin. Ka jingwanpoi jong ki sha kane ka shnong ka long kawei na ki jingkyrkhu kaba khraw bah iaka thain Mawshynrut lane Sonapahar.
Ki Nongwan jngoh kai baroh ki sngewtynnad ban wan sah hakine ki guesthouse haduh mynta namar ba ki khun pyrsa jong I Nahnah ki nang pynbha shuh shuh iaka. Ki don ruh ki pung hakaba ki briew nabar bad ki trai shnong bad pajih nongshong shnong ki ju pyn pyngngad ialade ban shong khwai.
