(Da u ma K. Kyndaid, Jowai)
Ka Ïingsyiem ha Jaiñtiapur ka dei ka ïng jong U Syiem Jaiñtia hyndai. La tei itynnad bha ïa kane ka ïing da u syiem Jaiñtia hi hadien ba u la ïoh knieh ïa kane ka jaka da ka thma ba shyrkhei bad ki syiem dkhar. Kumta u la buh nam ïa kane ka jaka ha ka kyrteng ka Hima jong u hi kaba long ka Jaiñtia bad Pur ka mut ka shnong ne jaka ba la ïoh knieh bad pynïasoh bad ka Hima Jaiñtia bad la khot ïa ka haduh mynta ka Jaiñtiapur. Kum ka nuksa – Badarpur kaba don ha Cachar District ka dei ka jaka jong uwei u dkhar bad u buh nam ïa ka ha ka kyrteng jong u. Kumjuh ruh Sonapur ka dei ka jong u Syiem Sona kaba la tip kum u Sona Raja bad ïa kane ka jaka la ai nam ha ka kyrteng jong u Sunapur. Ka Nagpur ka jaka jong ki bsein bad kumta ter ter. U Syiem Jaiñtia bad ki khun ki kti ki la ju sah hangne ha Jaiñtiapur tang ba ha ka por tlang bad ha ka por lyiur ki sah ha Nartiang namar ba shit eh ha Jaiñtiapur.
Sngewsih ban ong ba kane ka ïing Syiem ha Jaiñtiapur ka la jot la twa namar bym don shuh ba peit ba sumar ïa ka. Ym don hi ruh kiba na ka jait syiem ba kwah ban long Syiem Jaiñtia ne hiar pateng syiem ha ka jaka jong u, ka daw ka long ba ka long syiem mynta ki sngi ka long tang ha kyrteng hapoh ka jingsynshar ka wei pat ka bor synshar mynta ki sngi. U Conrad Sangma, Chief Minister ka sorkar Meghalaya jong ngi ryngkat bad ki myntri jong u, U Lahkmen Rymbui bad U Sniawbhalang Dhar ki la wan ïuh kjat ha kane ka ïing U Syiem Jaiñtia hyndai kaba la jot la twa ïa kaba la pyni ha ki kot khubor mynshem snem. Ki Jaiñtia ki la khmih lynti bha ba kin wad ki lad ki lynti ban thaw itynnad biang ña kane ka ïing Syiem khnang ba ka nam bad ka burom U Syiem Jaiñtia yn ïohi da kane ka pateng bad ka ban wan. Kumjuh ki khun ka ri bad kiwei de kin ïoh lad ban leit peit kai bad sah ruh teng teng.Phewse imat ym i long kumta bad ym ïoh sngew ei ei haduh mynta mynne. Hooid kan long ka jingtei shabar ka ri kumba la tei ïa ka Victoria Memorial ha Kolkata ban sah ka nam bad kyrteng pateng la pateng. Ki M.L.A. bad wat ki M.D.C. ruh kin sngewbha ban pdiang ïa kane ka jingai jingmut, bad kyrpad ïa ka sorkar India lyngba ka Ministry of External Affairs ba kan ïa jingïarap bad pynïoh ïa kane, khnang ba yn ïohi ïa ka ïing u Syiem Jaiñtia kaba na Mynbarim.