Naka “Ka Federation of All School Teachers Of Meghalaya (FASTOM),”Nyngkong eh, ngi pynpaw ka jingsngewnguh kaba khraw eh ia U Blei khrawbor baroh, U ba la kyrkhu kyrdoh bad pynioh ha ngi ia ka jingkoit jingkhiah kaba pura ba ngin lah ban trei ban ktah, ban shakri ia ki para briew bad khamtam ban shakri ia U. Kumta ko ki paralok Nonghikai ba ieit eh jong ngi, ngi ai khublei kyrpang ia phi baroh, kiba la kyrshan tyngeh shisha met bad mynsiem khlem kheiñ ia u slap bad ka lyer, phi la wan ban kyrshan pura ia ka jingiakhih ba la pynlong da ka Federation ha kine ki sngi khamtam ha kine ki khatwei sngi bala pynlong ia ka Matching Rally bad Sit-in-Demonstration lane ka jingiakhih ba jai jai da kaba shongkyllaiñ myngngor ha Galary Madan Malki, Shillong naduh 22 tarik September haduh ka tarik 02.October.2025. Ngi iohi ia ka jingkut jingmut kaba naduh ka dohnud bad ka mynsiem kaba shisha ba phi la kloi ban ia sahmiet ha Madan wat hapdeng ka jingkhriat bad ka jingshah dait ha ki kain pyrjong ruh kumjuh. Phi la iehnoh shipor ia ka ïing ka sem bad ki kam ki jam jongphi, hynrei da ka wei ka jingmut kaba skhem phi la shim ia ka rai ban wan ai ka jingkyrshan kaba pura ia ka Federation da ka jingmut kaba khuid kaba suba ban ioh kheit ia u soh bathiang.
Na ka Federation, ngim sngew ioh kyntien kaba ia ryngkat dor ban ai khublei kyrpang iaphi, te ngi shu ong beit “Khublei Shibun, To U Blei Un kyrkhu ia phi”. Ha kajuh ka por, ngi ai khublei kyrpang ruh ia ki Nonghikai baieit jong ngi, kiba la ia wan ryntih jan manla ka sngi sha jaka ba pynlong jingiakhih wat lada phim ia sahmiet ruh, hynrei ngi tip ba ka juh ka jingkitkhlieh phi la ai ka jingkyrshan ba pura ia ka jingiakhih, namar da ka jingwan ryntih jongphi kaba manla ka sngi, ka pynlong pat ia ka jingiakhih kaba ishongkun bad ishong nia haduh ba ngi la ioh kheit ia u soh ka jingkyrmen hadien lai phew ar snem ka jingkhmih lynti, wat la kam pat long shispah percent ruh.
Kum ki nongialam, ngi sngew kitram haba iohi ia ka jingshaniah skhem, kaba naduh ka dohnud bad ka mynsiem jongphi ha ki nongialam jongphi. Ngim don kyntien kaba kham ia ryngkat dor shisha bad ka jingieit kaba phi la ai ha ki nongialam ban ai khublei ia phi, te ngi shu ong beit “khublei Shibun” To U Blei un kyrkhu ia phi”. Shuh shuh, ngi ai khublei kyrpang ruh ia kito ki Nonghikai ba ieit jong ngi, ki bym pat ioh ia ka lad ban wan ai ka jingkyrshan kaba pura ia ka Federation ha kine ki sngi na ki daw bym lah ban kiar lehse bad ngi kyrmen skhem ba phin sa ioh ka lad kaba paka ban wan ban ai ka jingkyrshan kaba dap pura ha ka ia bad ka por kaba biang.
Khublei Shibun iaphi baroh, to U Blei un kyrkhu ia phi, na u ma E.G War, Publicity Secretary, FASTOM.
