(Delightfulson Pale BVSc 3rd Year)
Kaei ka Rabies?
Ka Rabies ka dei ka jingpang kaba ktah ïa ka khlieh kaba lah ban saphriang sha u briew lyngba ka umbiah jong ki mrad kiba rah ïa kane ka jingpang ha kaba kumba 90% na kine ki dei ki ksew.
U briew u lah ban ïoh ïa kane ka jingpang lyngba ka jingshah trut ne jingshah dait ha kine ki mrad.
Mano ba lah ban ïoh ïa kane ka jingpang?
Kane ka jingpang ka ktah ïa baroh ki briew kynthei bad shynrang naduh ki khunlung haduh ki tymmen, tangba ka kham ktah ïa ki khynnah kiba hapoh 15 snem.
Ki dak ki shin ha u briew
- Jingshit
- Kingkhlieh
- Ka jing thait ka met
- Ka jingpang, ka jingdait ha ka jaka ba shah dait
- Ka jingmih umbiah na shyntur
- Ka jingbym lah bam
- Ka jingjynjar ban nguid
- Ka jingtieng ïaka um
- Khiering
- Ka jingbym tip briew
- Ka jingïap naka jingbym lah ring pynhiar mynsiem
Kumno ban ïada
Ka jingïada kaba kongsan tam eh ban ïada naka rabies ka long lyngba ka jingai dawai tika na ka bynta ki jingri jong phi bad kumjuh ruh ïa phi.
Ka jingai dawai tika ïaki mrad jong phi:– Peit ba ki mrad jong phi khamtam eh ki ksew bad ki miaw ki long kiba lah dep ai dawai tika pura. Kane kan ïada ym tang ïaki hynrei kan pynhiar ruh ïaka jingsaphriang sha ki briew.
Ka jingkiar na ki mrad khlaw:– Kiar na kaba ktah ïa ki mrad khlaw khamtam kito kiba paw kumba pang ne kiba leh khampher. Pyntip sha ki bor kiba halor lada phi ïohi kum kine ki mrad.
Ka jingkiar naki ksew surok: Wat nym pyrshang ban leit ktah ïa ki ksew surok khamtam lada ki leh khampher.
Ka jingkitkhia ïaki jingri jong phi:- Synshar bha ïa ki mrad jong phi bad teh ïa ki lada ki don sha bar.
Wad ka jingsumar kaba mar mar:– Lada shah dait, pynkhuid ïaka jaka ba shah dait da ka um bad ka sabon bad leit sha ki jaka ai jingsumar ba hajan ban leit ai ïa ka dawai tika.
Ka jinghikai bad ka jingtip:- Ai ka jinghikai ïa kiba ha ïing ha sem jong phi, shaphang ka jingïada na ka rabies bad ka jingdonkam ban ai dawai tika.
Ka Rabies ka long ka jingpang kaba ma namar ym pat don jingsumar lada ïoh ïaka. Hynrei ngi lah pat ban ïada ïaka. Kumta ka long kaba kongsan tam ïangi ban sngewthuh ïaka daw, ki dak ki shin bad ïa kiba ri jingri, ka jingai tika pura bad ka jingsngewthuh namar kane ka long kaba donkam tam eh ban pyntikna ïaka koit ka khiah jong ki briew bad ki mrad.