(Da u M.M.Thaiang)
babteng:- U Paila uba la raikut ban pynkut iala ka jinglong samla ha ka Khun Tipsngi ki briew, u la pynpaw hakhmat I Mei, I Pa, ba un sa wad briew noh katba dangim ma ki bad u la kyrpad iala I Mei, I Pa, ba kin leit ia kyndduh biang ia ki kmie ki kpa jong ka Khun Tipsngi ki briew ba kin ai ka jubab ba un thikna ba un sngewthuh.
Shwa ba u Paila bad ka Khun Tipsngi ki briew kin pynkut ia ki sngi ka jinglong samla jong ki, ki kmie, ki kpa jong ki arliang mamla ki la iabuh ia ka por ban ia khangkwai ia u Samla bad ia ka Samla. Ka por khangkwai, ka long ka por ia ki arliang mamla ban iohpor ban leitmih ban leit iathuh sha la ki Kur ki Jait, ki Kha ki Man bad ia ki lok ki jor ba ka khun/ u khun jong ki, kin iapoikha poiman ha ka burom, ha ka hok katkum ka hukum. Ka por khangkwai ka long ruh ka por ha kaba ki arliang mamla jong ki arngut ki Khynraw (ki Khynroo-Khyllut) ki ia kynduh na ka por sha ka por.
Hadien ka jingkynduh kaba arsien laisien, ki kmie ki kpa jong ki arliang mamla bad ha ka jingiakylli ia tohkit ba ym don kano kano ka wit ka wa, ka shiliang, ka shiphiah, ka sang ka ma, ka khanglad, khanglynti, ka shongsang ka shongma, ka shongsmai, shongwyrnai, ka iashun, ka iabishni ba ki khun jong ki, kin iapoikha poiman ha ka hok, ka sot bad haba la biang u Snem, u Kynsai, ka Ratab, ka Rabi bad haba la ia biang ka kren ka khana, ki iabuh sngi ban ia pynhiar synjat lator kat kum ka Riti, ka Dustur kaba la saindur kat kum ka Sainpyrkhat jong ki longshwa ki manshwa jong u Paila bad ka Khun Tipsngi ki briew.
Ka pynhiar Synjat (iateh ktien) kat kum ka jingngeit jong ki, ka dei shibynta bad ka Niam ym kaba shu leh dep rukom. Ki kyntien jong ki Arkni, u Kni jong ka kynthei bad u Kni jong u shynrang bad ka juban lak jong ki arngut ki samla kaba ki la khlei hakhmat ki Kni Rangbah, hakhmat ki Kmie, ki Kpa bad ki lok ki jor kiba ia donlang ha kata ka sngi pynhiar synjat ki long ki ktien kiba shongsbai ha kaba ki arngut ki Samla kim shym la kular-kai.
Ha ka sngi pynhiar Synjat, shwa ka pynhiar Synjat, ki Arkni jong u Shynrang bad jong ka Kynthei, ki ia kynduhlang ban ianguhblei, dembleilang bad ki da pan da ka dak ka shin na U Blei, Ki Blei lyngba u Klong u Skaw, ka Harak, ka Sidhiar (Rice beer) bad ka liem ka lup u Pathi, u Kwai.Na ka liem ka lup jong u Pathi, u Kwai bad ka sohlymbar lynthiang ka Harak, ka Sidhiar ha u Klong u Skaw,ym don ka pamsapet, ka pamsapar u Klong u Skaw, ki bha ki miat kumba ud,kumba nam, kumba khot kumba ting bad lyngba kine ki dak ki shin ,kiba paw tyngkrein, ki Arkni, ki la sngewthuh ba kane ka shongkha shongman jong ka Khun Tipsngi ki briew bad u Paila ka long kaba neh kaba skhem, kaba ym don ka jingiaphet lane iapyllait sanshyieng lymda la pynllait na U Kynrad da ka jingiap shiliang shiliang.
Hadien ka jingpynhiar Synjat-Lator, wat lada kine ki arngut ki Samla (u Paila bad ka Khun Tipsngi ki briew) kim pat iashong iasah ryngkat (shirup-deilang), pynban naduh kata ka sngi ne ka khyllipmat, u Paila u la dei u jong ka Khun Tipsngi ki briew bad ka Khun Tipsngi ki briew ka dei ka jong u Paila. Hadien ka pynhiar Synjat shwa ban poi ka sngibia (sngi kyntiew kurim) ki Arkni jong ki Samla (Paila bad Khun Tipsngi ki briew) ki la iakhum iateh ba lada jia ba u shynrang bad ka kynthei ki iatamkti, tamkjat, u shynrang sha kawei pat ka kynthei lane ka kynthei sha uwei pat u shynrang, u ne ka kin hap siew ka kuna bad iakhlad syndon wat lada la dep ka pynhiar synjat.
Ha kata ka sngi pynhiar Synjat, u Paila bad ka Khun Tipsngi ki briew, kum ka dak ka jingieid, ka jingiakhum iateh jong ki, ki la don ka jingia-ai sngewbha markylliang. Ka Khun Tipsngi ki briew ka pynkup ia u Paila da ka Thatryndia-tlem katba u Paila, da ka Jainmuka bad ka Satti Ksiar. Kane ka jingia-ai markylliang kam dei ka baikurim ne ka dor ka mur ba la siewdor u shynrang ia ka kynthei lane ka kynthei ia u shynrang ne ka jingiadie iathied u shynrang ia ka kynthei lane ka kynthei ia u shynrang, hynrei ka jingia-ai sngewbha markylliang bad ka dak ka shin ka jingiaieid bad jingiaburom markylliang bad ka dak ka shin ba la iakhum iateh skhem bha kaba ymlah shuh ban pyllait khlem da don kano kano ka daw kaba biang.
Hadien ka sngi pynhiar Synjat haduh shwa ka Sngibia (Sngikyntiew kurim) kaba ym duna ia ka ar-lai bnai, shwa ka sngibia ne sngikyntiew ,kurim bad kane ka jingbuh por jong ki ka long ba ki arliangkur (ka kur jong u shynrang bad ka kur jong ka kynthei) kin iohlad ban leitmih sha la ki kur ki jait, ki kha ki man, ki kharim, ki khathymmai, sha ki lok, ki jor bad sha baroh kito kiba dangdon jingiadei ban pyntip bad khot sngewbha ia ki, ba ka/ u khun jong ki, kin iabia ne ia kyntiew kurim bad uta uta ne bad kata kata.