[Da u S. Lamin]
U Khynriam u Pnar u Bhoi bad u War ki dei ki paid u Khasi ba iar, ki don ha la ki jong ki jong ki rukom kren ki rukom ring sur ki rukom kynnoh bad kaba kongsan eh ka dei ba baroh na ki, ki ai jait ha ka Kmie kaba long ka nong sumar sukher, tangba u War ha la ka ktien hi u Pnar ha la ka sur hi u Bhoi ha la ka rukom kren hi hynrei baroh na kine ki ia sngewthuh lut ia ka ktien khasi kaba dei ka ktien kaba la pule ha ki skul bad ha kiwei de, lada kiwei ki ktien kum u War lada ia kren bad u Bhoi ym ia pei phang eiei hynrei tang shu kren da ka ktien Khasi hangta la iashai lang baroh hangne la sngewthuh ba ka ktien Khasi ka dei ka ktien nongmei nongpa.
Ka kam rep kam riang ha u Khasi ka dei ka kam kaba kongsan haduh katta katta, ha u Khasi ka kam rep ka la sdang naduh kulong kumah naduh hyndai hynthai naduh ba dang lung ka pyrthei. Ki briew kiba im hapoh ri khasi kiba bun hi ki dei ki briew kiba trei shitom kiba im sngi ha ka puh ka daiñ ha ka kiew ka hiar ha ka leit lum leit wah khamtam sha thaiñ nongkyndong.
Hangne ngin ia peit ia kita ki jait jingrep kiba la hiar pateng la pateng naduh mynshuwa haduh mynta ha ka jait bynriew Khasi kiba kynthup u Khynriam u Pnar u Bhoi bad u War, hynrei u Pnar hi kiba bun ki rep da u Kba, ki jait jingrep ki bun ba u Khasi u rep hynrei hangne ngin ia peit tang lai jait kita ki long ka rep Kwai rep Tympew bad rep Synsar.
Ka jaid bynriew Khasi kaba im ha ka rep ka riang bad ki jait jingrep kaba ki smat bha ban rep ki dei u Kwai u Tympew bad u Synsar. Ban rep ia kine kam long kaba suk hynrei la hap ban pynlut ia ki sngi ki bnai bad ki snem tang ban sumar sukher ia ki. Kaba kham neh slem ka rta na kine ka dei u kwai bad u synsar ia u Tympew pat ka shong ha ka jingsan ka khlaw bad lait na ka bam tram, tangba ia u Tympew pat la ioh ban kheit baroh shi snem lynter, katba ia u kwai u synshar ki kheit tang shisien ha ka shi snem.
Ki ju thung ia u Kwai u Tympew bad u Synsar tang ha ka por Lyiur namar lada ym don slap kine kim lah ban im bad lada jur slap palat ruh bun na ki kin iap. Ia u Tympew ki ju thung ha ki khlaw kiba long san bad ha shuwa ban thung ia u Tympew kida wer kida pynkhuid kida thiew ia ki tang ki jyrmi khnang ba un lait na ki phlang ki kymbat, ki ju thung ia u Tympew ha ki trai diengbah ha ki dieng Kwai ter ter, hadien katto katne por ba la dep thung ki sa kiew ia ki dieng khnang ba un ioh sboh, un ioh sngi bad ba un lah ban kyan bha, namar lada ym leh kumta u Tympew un iapstai bad um lah ban pur ha ki dieng. Naduh ba thung ia u haduh ba un da kham heh ki dem diap ban sumar ia u ba un lait na ka bam tram bad ha ka por Tlang pat ki ai um ia u ba un lait na ka iap stem lane iap tyrkhong.
Ia u Kwai ruh ki thung ha ka por Lyiur tangba u kwai pat khamsuk ban sumar namar hadien ba la dep thung ia u ym donkam ban leh kumba leh ia u Tympew, hynrei ynda la poi ka por tlang pat ki ju pynkhuid ia ka trai jong u khnang ba ki jyrmi kim ioh ban sop ia ka kliar jong u. Ia u Kwai ki ju pynkhuid shisien ha ka shi snem hynrei don ki khep pat ki pynkhuid ar sien ruh. Ka shim por ruh da ki snem ba u kwai un soh tangba don ki jaka ba u slem don pat ki jaka ba u kloi ban mihsoh.
U Synsar u dei u mar rep uba kham khlaiñ bor tangba ia u Synsar ruh ki thung ha ka por Lyiur, ki ju pynkhuid bad wer ia u Synshar dei ha ka por Lyiur namar ha ka por Lyiur ki mih bha ki plung jong u ki ju wer bad pom ia kito kiba la eh bad ki sa ieh tang ia kito ki ba dang lung. Don ruh ki jaka ba ki briew hadien ba la dep kheit ia u ki sa thang da ka ding, hynrei kane ka rukom leh pat ka pyntlot bor ia u Synsar u phuh te phuh bha tangba ka kham shim por pat ba un heh kum ha ki jaka ba khlem thang da ka ding.
