(M.M.Thaiang)
Ka Wah Myntdu ka mih na shnong Mihmyntdu Jowai bad katba ka dangtuid arsut shaduh ri Bangladesh la khot kyrteng ia ka da ka kyrteng ka bapher bapher. Sha ka thain Pdengshakap ia ka wah Myntdu la tip ia ka kum ka Leskha bad ha ka thain Borghat la tip ia ka kum ka wah Tisang. Ka wah Myntdu katba ka dangtuid arsut sha Bangladesh ka la nangkylla wahbah da ka jingtuid kiba bun ki shnatwah kiba tuid na East Jaintia Hills District bad na Amlarem Civil Sub-division.
Da ka jingkhot sngewbha jong u Babu Dil Lyngdoh, kum shi bynta ban ia sakhilang ia ka jingplie pynkhreh Jubili jingdap shispah snem ka jingwan ka Balang Katholik ha ka shnong Borghat, une u Nongthoh u la iohlad ban wan sha Borghat bad ha kane ka jingwan la iohlad ban ia kynduh ia ki ‘riew rangbah ka Borghat bad ia kiwei de ki Rangbah kiba na ki shnong ba marjan jong ka Borghat. Ha ka jingiashongkai bad ia khana-parom, une u Nongthoh u la ioh ia shibun ki Parom bad ki Khanatang shaphang ka Hima bah u Syiem Sutnga (ia kaba kham hadien la tip kum ki Syiem Jaintia) bad shaphang ka shnong Borghat, ka shnong kaba shisien ka sngi haba ka ri Jaintia ka dang don la u Syiem, ka long ka shnong kaba shong ki Syiem Sutnga bad kane ka khanatang bad ka parom ym tang kaba shu iathuh puriskam, hynrei kaba da paw tyngkrein na ki dak ki shin jong ki Syiem Sutnga.
Ha shnong Borghat wat la ka iingsyiem ki Syiem Sutnga lane Syiem Jaintia kam don shuh ka la jot ka la pra, hynrei ki dak ki shin ki dangneh dangsah kum ki Diengjri kiba la ong ba la thung naduh ka por jong u Syiem Borguhain bad ka iingsyiem kaba long ruh ka Duwan ka Dupat knia jingknia jong ki Syiem Sutnga, ia ki Ryngkaw, ki Basa, ia ki Blei ki Dkhen kiba long ki Nongda Nongker jong ka It ka Hima, ia u Syiem bad ia ki Khun ki Hajar jong ka Hima.
Ki ‘riew rangbah ka thain haba iathuh ha une u Nongthoh shaphang ka shnong Borghat la ong ba haba ka Ri Khat-ar Dolloi ka dang don la u Syiem (Syiem Sutnga lane ki Syiem Jaintia) ka shnong Borghat ka long kawei na ki shnong shong Syiem bad ka “KUT BAKHLAIN” jong ki Syiem kaba dei peit ia ki bynta jong ka Hima, ia ki Hali ki Pynthor na sha ka Thain Jaintiapur, Sylhet lane kata ka thain Shilot, Alchera, Shrimangkor bad ia kiwei de ki shnong kiba danghap hapoh ka Hima.
Ha ka por ki Syiem Sutnga lane Syiem Jaintia la ong ba ha Borghat ka don ka Iew Syiem (ka Iaw Syiem) kaba heh ha kaba ki briew napoh ka Hima Syiem Sutnga/Syiem Jaintia, ki wan die ia ki mar rep mar riang jong ki kum ka Neilieh, ka Nei-iong, u Syieng, ka Shriew, u Sohmynken bad kiwei de ki jait jhur bad jait jingbam, katba ki briew kiba nabar ka Hima (East Bengal) ki wan die ia ki Dohkha ktung kiba bun jait. La ong ruh ba ha kata ka por ka jingiadie iathied kam da dei eh da ka pisa ka tyngka, hynrei kaba shu ia kylliang da ka mar. Kum ban shu ong noh shi kilo u Nei-iong bad shi kilo ka Dohkha ktung lane shi kilo ka Shriew bad shi kilo ar kilo u Khaw bad kumta ter ter.
Ha shnong Borghat ki don ar tylli ki Dieng kiba la ong ba la thung naduh ka por u Syiem Borguhain, uwei u Diengjri bad uwei u Dieng Latang. Une u Diengjri u dangneh dangsah haduh mynta katba u Dienglatang, uba don ha phyllaw ka iingskul Borghat ha ka jingwan ka ‘eriong ‘erngit kaba jur ha kine ki snem ba la lah ka la jynrat bad pynkhein la jan ia baroh ki tnat jong une u Dienglatang, kawei ruh ba u ieng hakhmat ka iingskul, la ong ruh ban lait na ka jingban ki tnat jong une u dieng ia ki khynnah skul kaba lah ban jia ha kano kano ka por, ki la pom bad pynkhyllem noh.
U Diengjri u don harud wah ka Wah Tisang bad ha ka Syrngiew ba kahtngen jong une u Diengjri dangpaw ki dak ki shin, ki Mawsiang, ki Mawknor, ki Kor shongthait kiba u Syiem u shong pyngngat ha ka jingbeh ka lyer pyngngat na ka wah Tisang. Ha kane ka jaka shong pyngngat jong u Syiem, ka don ka Kut bakhlain jong ki ‘riew kiengwait, kiengstieh jong ka It ka Hima. Hapoh ki syrngiew jong une u Diengjri ka don ka Madan kaba heh ha kaba la ong ba ka dei ka Madan shongdorbar jong u Syiem bad la ki Myntri (Lyngskor) bad ki Dolloi jong ka It ka Hima na ka por sha ka por ha ka ban pyniaid beit iaid ryntih ia ka synshar ka khaddar hapoh ka Hima.
Ha Borghat la ong ba ka don ka Iew Syiem kaba long ka Iewpdeng hapdeng ki Nongshong shnong jong ka Hima bad ki briew kiba nabar ka Hima. Haba ka Ri India ka la ioh ia ka jinglaitluid na ka jingsynshar ki Phareng (Foreign Yoke) bad pyniakhlad ia ka Rilum bad ka Rithor, ha kaba ia ka Rithor la pynhap hapoh ka East Pakistan bad ia ka Rilum la pynneh hapoh ka Ri India. Hadien ka jingiohlaitluid, kane ka Iew Syiem ka la duhnoh.
Ka shnong Borghat ka hap hapoh ka Elaka u Dolloi Lakadong, u Dolloi Lakadong ha ryngkat ki Nongshong shnong jong ka Elaka, ban pynneh pynsah ia kane ka matti jong ki Syiem, ki la pynkhie im biang ia kane ka Iew bad mynta ka long iew shisien shitaiew.
Ha shnong Borghat ka don ka Mynkoi (Thwai) ia kaba la khot ka Mynkoi sait Wait. Mynkoi sait Wait, ka dei ka kynja pung ha kaba ki Nongknia jingknia ki la dep knia hapoh kane ka jaka mane blei jong ki Syiem (ka Jingtei kaba dangieng kynshreng haduh mynta) bad ia ka snam ki jingknia kiba bit ha ki Wait, ki leit sait ha kane ka pung lane ka Mynkoi bad haduh mynta ia kane ka pung lane ka Mynkoi latip kum ka Mynkoi lane ka Pung sait Wait.
Ka shnong Borghat bad ka iingsyiem jong u Syiem Sutnga lane Syiem Jaintia ka don harud wah jong ka Wah Tisang bad u Syiem miet step u hiar sum ha kane ka wah. Ha kane ka wah (Tisang) ki don saw jaka ki jaka sum (1) ka jaka sum ki poiwir nangne nangtai (2) ka jaka sum ki shynrang (3) ka jaka sum na ka bynta ki kynthei (4 ) kaba long hanengduh ka jaka sum jong u Syiem bad ki Mahadei jong u. Kine ki jaka sum ba kyrpang ia kumba long mynta ki shu sah tang ha ka khanaparom, ki shu sah tang ki dak ki shin naba khlem da sumar ia kine ki jaka la tap da u Shyiap bad ki Maw bad ia kane ka Madan KUT mynta la dap satang ki Diengkwai.
Ka shnong Borghat ka long kawei na ki shnong kaba la rim bad ka shnong shong Syiem jong ki Syiem ka Hima bah ki Syiem Sutnga. Ka shnong Borghat ka long ka shnong ba kam da heh eh, ka don harud wah jong ka wah Tisang. Ka shnong ka bakhuid bad kaba pyngngat lyiur bad tlang da ka jingbeh ka ‘erpyngngat na ka wah Tisang.
Ha ka shnong Borghat ka don ka jingkieng kaba itynnad ha ka wah Tisang kaba pyniasoh ia ka East Jaintia Hills District bad ka Amlarem Civil Sub-Division.