(MM. Thaiang, Jowai)
Haba shim na ki Dulir bad ki kot ki sla la shem ba naduh kulong kumah ka thaiñ Labang-Nongphyllut bad Pangam Raliang ia kaba ki briew ki kham iatip mynta kum ka Block-1, ka dei ka bynta jong ka Ri Jaiñtia. Haba shim na ka Historical background la pynlong ia ka Block-1 da kaba khliah shibynta na ka Elaka Raliang ia kaba la tip kum ka Pangam Raliang, shibynta na ka Elaka Shilliangmyntang, shibynta na ka Elaka Nongjngi bad ia ka Elaka Labang-Nongphyllut baroh kawei.
Ha ka jingai District ia ka Mikir Hills bad North Cachar Hills ha ka snem 1951 bad ha ka jingioh ia ka Jylla Meghalaya ha ka snem 1972 bad haduh mynta ym pat don u pud u sam uba thikna hapdeng ka West Jaintia Hills District Meghalaya bad ka West Karbi-Anglong Assam bad lah ban ong ba haduh mynta kane ka thaiñ ka dang don hapdeng ka jingiakhajia pud bad ym pat lah ban ong ba kane ka thaiñ Labang-Nongphyllut bad Pangam-raliang (Block 1) ka jongno, ka jong ka Karbi-Anglong Assam ne ka jong ka Jaiñtia Hills District Meghalaya?
Na ki kot khubor la iohi ba ki bor jong ki ar District West Jaiñtia Hills District Meghalaya bad West Karbi-Anglong Assam kin ia kynduh ha ka 19 tarik mynta u bnai ha Jowai. Hato ha kane ka jingiakynduh jong kine ki ar District kin ia kren shaphang u Pud u Sam ne tang shaphang ka Law and Order na ka bynta ka jingiashongsuk shongsaiñ ki paidbah kane ka thaiñ katba ym pat don u pud u sam uba thikna hapdeng ka West Jaiñtia Hills District Meghalaya bad ka West Karbi-Anglong Assam.