Ka long ka jingsngewsarong bad ka jingkmen na ka bynta ka Jylla Meghalaya ban ïoh ia ka khubor ba i Kong Riiohlang Dhar kan mihkhmat ia ka India kum ka nongiarap ban pyniaid ia ka jingialehkai phutbol (Assistant Referee) ha ka World Cup jong ki kynthei kiba hapoh 17 snem ia kaba yn sdang naduh ka 16 Tarik mynta u bnai.
I kong Riiohlang i dei ruh iba ar na India ban ioh mihkhmat ia ka ri sha katei ka lympung kaba heh.
Na ka liang i kong Riiohlang i la ong ba bun ki briew ki angnud ban shah jied lymne ban ioh rung khlieh kum ka nongpyniaid hynrei i la ong ba ka thong jong i ka long na ka bynta ka FIFA World Cup ym tang ban shu kut noh ha ka jingioh syrnod.
“Nga hap ban trei shitom bad kham palat ia kaba nga leh man ka sngi, kata ia ka met bad jingmut jong nga bad khamtam ba ngan lait na ka jingmynsaw. Nga kwah ruh ban ai mynsiem ia ki para kynthei kiba iaid ha kane ka juh ka lynti ba kim dei ban phaidien ne randien. Hooid ka kam rephri ka long kaba eh bad teng teng ngi shah wohnia ne shah kdewkti ha ki paidbah, ki coach bad ki nongialehkai hynrei kadei ia ngi dei ban pynleit jingmut bad iaid shaphrang namar kane ka ialam ia ngi sha khliehduh” ong i Kong Riiohlang.
