KATTO KATNE SHAPHANG KA ELAKA LABANG-NONGPHYLLUT DOLLOISHIP

KATTO KATNE SHAPHANG KA ELAKA LABANG-NONGPHYLLUT DOLLOISHIP

                        (M.M.Thaiang)

Bteng na ka issue ba la dep

            Hadien ka jinglaitluid jong ka ri India ha ka 15 tarik August 1947, na ka jingsynshar ki Phareng (British rulers), ka sorkar Assam na ka bynta ka jingbit jingbiang ka jingsynshar jong ka, ka la thaw sa kawei ka District bathymmai ia kaba la tip kum ka Mikir & North Cachar Hills, da kaba pynkhlad bad pyniasoh jubor (forcibly tagged) ia ki bynta ka Jowai Sub-division jong ka United Khasi & Jaintia Hills District, Notification No. TAD/R/31/50/ 151 dated 13^th April 1951. Ka jingpruid dak ia u pud u sam jong ka Mikir Hills (Karbi-Anglong ba mynta), la shu antat bad thaw khlieh ha kawei ka Bangla Minister, hapdeng ki Bitor bad ki Klat, khlem da wan iuhkjat ban tip ia ki Lum ki Wah (la sot na ka Record of Political Ecconomic and Cultural Affair jong ka Elaka u Dolloi Nongphyllut).

            Kane ka Notification No. TAD/R/31/50/151 dated 13 th April 1951, kam shym la pynkhlad jubor na ka Ri Jaintia (Jowai Sub-division) tang ia ka Elaka u Dolloi Nongphyllut, ka la kdiah ruh ia shibynta ka bynta jong ka Elaka u Dolloi Raliang, shibynta na u pud u sam jong ka Elaka u Dolloi Shilliang Myntang bad shibynta na ka Elaka u Dolloi Nongjngi. Hadien ba la pyniakhlad jubor ia ka Elaka u Dolloi Nongphyllut bad ia ki bynta jong ka Elaka Raliang, Shilliang-myntang bad Nongjngi Dolloiship, ia kane ka bynta kaba la pyniakhlad jubor na ka Ri Jaintia (Jowai Sub-division jong ka United Khasi & Jaintia Hills bad pyniasoh jubor bad ka District Mikir & North Cachar Hills, hapdeng ka jingpynshah na ki nongshong shnong  kane ka thain, la shu khot noh ia kane ka bynta kaba la kdiah ne pyniakhlad jubor na ka Ri Jaintia naba ym pat pynthikna ba dei ki bynta jong ka Mikir & North Cachar Hills,la  shu khot-noh kum “KA BLOCK I”.

            Bun ki briew ki bym pat tip ia ka duh ka dang jong kane ka Thain Labang-Nongphyllut bad Pangam-raliang bad ki la shutip kum “ka Block I”. Kum ban shu pynkynmaw ia ki Nongpule bad ia ka Sorkar Meghalaya ban tip kham bniah hadien ba la pyniasoh jubor justi ia shibynta ka ka bynta ka Elaka u Dolloi Raliang, shibynta ka Elaka u Dolloi Shilliang-Myntang, shibynta ka Elaka u Dolloi Nongjngi bad baroh kawei ka Elaka u Dolloi Nongphyllut, la khot kyllum ia kine ki bynta kum kawei ka Hima  bad ia kane ka Hima la tip kum  ka “BLOCK I”.

            Ki paidbah nongshong shnong jong kine ki Elaka, kiba la shah ktah da ka Assam Notification No. TAD/R/31/50/151 dated 13^th April 1951, ka notification kaba pybnkhlad jubor ia kane ka thain “BLOCK I” na ka Rilum Jaintia (Jowai Sub-division jong ka United Khasi & Jaintia Hills District). Mar ia mih kane ka Notification, la don ka jingiakhih kaba jur pyrshah ia kane ka jingleh jong ka sorkar Assam ban pynkhlad ia ki Labang- ki Nongphyllut bad ki Pangam-raliang,na ki paradoh, ki  parasnam jong ki, ki Khasi, ki Pnar. Ha kane ka jingieng pyrshah jong ki paidbah pyrshah ia ka Assam Notification, ka sorkar Assam ka la kem ia ki Nongialam ka thain kiba kynthup ia u Waheh Jony Lyngdoh, Waheh Sbut Larom, Waheh Eliwon Lyngdoh Nongsubi, Waheh Trod Thaiang, Waheh Jony Tamaha, Waheh Basa Rongphar, Waheh Kot Marten, Waheh Thung Khyrwang bad kiwei de ki Nongialam ka thain bad set Along ia ki sha Baithalangsoh bad Nawgong Jail.

            Katba ka sorkar Assam ka dangkem shuh shuh ia ki Nongialam ialeh pyrshah ia ka Assam Notification No.TAD/ R/31/50/151 dated 13^th April 1951 kiba kynthup ia u Waheh Bulut Lekhaden, Waheh Muhon Lamare, Waheh Phet War bad ia kiwei de ki Waheh, katta ka jingiakhih pyrshah ka la nangjur hapoh ka jingialam jong u Pa Dolloi, u Honriwell Parampet, u Dolloi Labang-Nongphyllut bad hapoh ka jingialam jong u Waheh Red Dkhar na Raliang, uba long ruh u Nongmihkhmat u Dolloi Raliang uba dei peit ia ka thain Pangam-raliang, ka bynta jong u Dolloi Raliang.

            Haba la jur ka jingiakhih, u C.S. Booth, Sub-divisional ka Jowai Sub-division (SDO), ha ka 13 tarik March 1953,u la wan jngoh hi dalade ban lap ia ka jingshisha. U C.S. Booth (SDO,Jowai) ha ryngkat bad ki Nongbud Nongrap (Police ne Pulit) da kaba shong da ki Kulai, ki la wan jurib la jan ia baroh ki shnong jong ka Elaka u Dolloi Nongphyllut kum sha Nongjrong, Moorap, Laher, Mooriap,Mooknor, Umsalait, Lumpliah, Khyndeliar, Mukhim, Phlang moorud( Phlang ba mynta), Kyarabon, Lamarang, Moowakhain, Deinler,Moojem bad ia kiwei de ki shnong kiba don hapoh ka Elaka u Dolloi Raliang, Shilliang-myntang bad Nongjngi. (yn dangbteng)