-Da u, Chandame Sungoh
Chutwakhu, Jowai –
Lada pait kat kam i pyrtuid kani ka Artikle tea jan īe phi u ong wa katea kawa maīa o ka wym em cheini toh ka bru ne ka khyllood ka chan o nea. Tang wym toh kam tea : katea kawa maīa o toh kawi naki Seiñ Saiñ pyrthai ne kawa ong i heiktien palad chnong ka Political Party wa man leh ka Party Rilum Khasi Jaintia (Regional Party) kawa rim tam haka jylla īong i .
Katea toh ka Hills State People Democratic Party (HSPDP) kawa da seiñ da pun da kha ïaka haka 1 tarik u bnai Khonchonglad (November) snem 1968 soo snem ha chwa wow īoh state ka Meghalaya.
Nga ym toh u tea u wathoh kot wa biang ka kyrdan purea puthi lane i tip i stad kam U Waheh O. R. Challam, U Rev.Dr. H. H Mohrmen U M. M. Thaiang wa kiwi kiwi kiwa thoh kot. Ym toh leh u wa tip bha iaka tea ka history īong ka jylla īong i, han la katte leh u pyrchang o u thoh khnang wow pyntip ia ki khon ka Bri U Ynñiawtrep Ynñiaw wasa chaphang kani kawa maīa iong nga.
Lada kyr-uiñ i cha ki parom kiwa da dep dalai tea chem i wa ka jaitbru iong i toh kawa chah pynbeij kawa chah chet chukor ne chah lehbeiñ. I leh wa ong o kamtea? Ngait o jan ban ïa nga tea phi warap tip bha īei tea. Kat kam ka yutip wada īoh , ka sorkar phareng da sdang ko u synchar lehbor ïaka ri Khasi Jaintia īong i naduh ka snem 1833 A.D. Kamtea naduh ka snem 1833 haduh 1947 kamwa 114 snem tam da chah synchar i haka sorkar phareng. Nadu wa īoh i ïaka jinglaitluid haka 15. 8. 1947 sñiaw kamwa da īoh sakhiat i iaka tea ka jinglaitluid ne iaka hok iong i. Pynban wym toh kamtea, mar dei khangtleiñ, kamwa ong kiwa stad klam tea, ” Lait naka kti u thlen, kluk ha tyndam u khla ” thiej kamtea sakhiat !
Kat kam wada ia soi ki Syiem ka Hima Khasi wa khut ki ka Federation of Khasi States waki waheh ka Indian Dominion hachwa wow saiñdur ïaka Ri India kam ka Ri synchar Paitbah ne ka Democratic Country katea ka Instrument Of Accession (IOA) haka 15. 12. 1947 tea ka Ri Khasi Jaintia īong i toh u ioh ko iaka State kawa pura naduh nyngkong ki sngi sdang ïaka ri India kam ka Assam, Manipur wa Tripura . Pynban wym toh kamtea, da ngiat ia i chaka Sixth Schedule hei kyrdan District Council hi eh hapoh i synchar ka Sorkar Assam.
Kamtea ki waheh īong i da dup ki u ialeh u iakhih wow īoh biang iaka State kawa pura. Kamtea ka jingīakhih da sdang ko naduh ki snem 1955-56 hapoh ka Party Eastern India Tribal Union (E.I.T.U). Hadien neitea wan, wan īasoh sa u Garo hei pyniatoh wa man ki para wa e jait chaka kynthai tea chna wan ki daka pary All Party Hills Leaders Conference (APHLC ) wa u Capt. W.A Sangma man u, u President wa nyngkong .
Ha pyrdi wa kop wa rahi bha ka diñ īong ka jingialeh, u mynsien ksuid mynsien soitan da psiah u ha u Capt. W.A Sangma wa haki kattu katni ki waheh Khasi īong i. I tea i mynsien ksuid mynsien soitan toh wow pdiang ïaka Sub- State kawa khlem u pud u sam uwa tikna. Mar īatip wa uni u Capt. Sangma da em u kaitea i mynsien tea kiwa iah khmat na ka jaitbru iong i kiwa dangtip iei hok ieisot da ieiñ ïaleh ki ïeini. Ym em u sñiaw iahap ne sniawtoh sniawtne ki wow pdiang katea ka State kawa chiteiñ kawa khlem u pud u ang uwa pura. Neitea i daw da mih i wym ia sñiaw thuh jingmut, jet i pra hapoh kani ka party. Ha kawa u ni u Capt. W . A Sangma wa u Bah Bring Buhai Lyngdoh da beh seiñ beh party ki īa u Bah Hoppingstone Lyngdoh waki lok ki īong u naka party A.P.H.L.C du neidaw wym iangait ki wow pdiang ïaka tea ka Sub- State kawa khlem u pud u ang.
Kamtea, dei mynsien wa sniawkhia wa sñawchrai u Bah Hoppingstone Lyngdoh waki wabood īong u kam u Bah, Meshak Kharkongor, Aristerkhos Basaiawmoit waki wi tawan ki khadle ngut ki khroo pyrkhat khroo yutang da seiñ ki ïaka Hills State Volunteers Adhoc Committee (H.S.V.A.C) haka 3.7.1968 ha kawa kini ki volunteers kylleiñ ka ri Khasi Jaintia da ialeh chitom ki met wa mynsien wow īoh iaka jylla wa pura. Hadien neitea tea chna pynmiat pynbha lane chna pynskem wan ki daka party Hills State People Democratic Party (H.S.P.D.P) haka 1. 11. 1968 ha ka wa u Bah Hoppingstone Lyngdoh man u kam u President wa nyngkong wa u Bah Aristerkhos Basaiawmoit kam u Secretary wa nyngkong dooh. Pynban sñiaw sih u ong waka jait bru Khasi Pnar īong i katda toh ka jait bru Tham iaboh iatan tnoo tea haduh wa jop hi da uni u Garo tea ïoh u u pdiang ïaka State kawa khlem pud khlem sam kawa pynchitom pyn jynjar iaki hajar hajar ki paradoh parasnam īong i kiwa chong wasah chaki thaw khap pud. Ioh uru u man kam u Chief Minister wa nyngkong wei pynskem wot īei pyrtuid hei ktien dkhar Bengali ‘Meghalaya’ kawa mut ka ïung ki lyoh (abode of clouds ). Kamwa da ong chwa o wa kani ka party toh kawa rim tam hapoh ka jylla īong i kawa ieiñ leh haka iurim wow iachah iaker iaka hok iaka khyndaw ka shyiap īong ka ri waka jait bru Khasi Pnar iong i. Han la katte leh kiwa boon ki bru īong i khamtam hari Jaintia wym sniawthuh wym pdiang ki iakani ka party. Em leh kibru Pnar iong i kiwa ong ka party Khasi party Khynriam nea. Ia kuhea pathan iakitea ki Party Garo Party Dkhar kam ka Congress, BJP, TMC wa NPP. Heithaw wow ia tylli īa ryntih haka wi don ka Party wow īoh u synchar pun da i ia i.