[Da U Soolangki D.Laloo, Loomkyrwiang, Jwai]
Ynne ka sngi wow sah kynmoo
Íow khlawait ka Ri, u khon wakroo.
Wa yieñ ialeh neibynta ka Ri
Íow lait nei broo, ha u mynder sepsngi.
Kiang Nangbah toh dume donhi
U nongialam wachlur ka Ri.
Satar hei man, satar hei kam
Dapchynrang hei ktien, dapchynrang hei klam.
Nongialeh wa sakhiat kam me!
Ha pyrthai cheiwon u chem wande
Wym suk du peit wow chong kli kti
Yei chah lehbieñ ki khon ka Ri.
Yootein wan u peit ha ka juk katni
Hiardor iman nongialam ki khon ka Ri.
Boon sadu ki Doloi tyngker
Wakhia I pyrkhat, stin kam u sder.
Kiang Nangbah ha u dien pasi
Íap neibynta ka jaitbru ka Ri.
Nongialam wan ka juk katni
Pyrkhat sadu yei pran samen donhi.
Ki rood ki kiar ki khon ka Ri
Ïam, kiat, miet, step, synniaw wa sngi
Nongialam da khlot, da thlah hawa peit
Ía ki wapli daieh lyngkdang, syngeit.
A ileh wajia, waman kamni
Ía ki nongialam ka Ri iong-I ?
Dait-thah I sniaw ki hadooh katni
Pyn yei doh, I snam iongki dahi.
A khon ka Ri, khutlang o iaphi
Kat dang biang I por to pyrkhat, to sylli.
Ham ia ang hi-eh yei wa thaba
Ía samboi u sep-ai ki khon ka Ri Jaintia.
👍